На 1.632-от ден од целосната руска агресија против Украина, Русија повторно нападна цивилна транспортна инфраструктура. На 13 август, руски реактивен дрон погодил локомотива на патнички воз во Одеската област, во кој имало 340 луѓе. Во нападот загинаа машиновозачот и неговиот помошник, додека патниците биле евакуирани и префрлени кон Одеса, според украинските и меѓународните извештаи.
Амбасадорката на Украина во Северна Македонија, Лариса Дир, во објава на платформата X го оцени нападот како уште едно воено злосторство на Руската Федерација против цивилното население.
„Ден 1632. Денес во Одеската област рф со реактивен дрон нападна патнички воз во кој имало 340 луѓе. Загинаа машиновозачот и неговиот помошник. Нападот врз воз со стотици цивили е уште едно воено злосторство на рф против мирното население, за кое агресорот мора да одговара“, порача Дир.
Ден 1632. Денес во Одеската област рф со реактивен дрон нападна патнички воз во кој имало 340 луѓе. Загинаа машиновозачот и неговиот помошник. Нападот врз воз со стотици цивили е уште едно воено злосторство на рф против мирното население, за кое агресорот мора да одговара. pic.twitter.com/2cLMccdb0G
— Larysa Dir (@dir_larysa) August 13, 2026
Според достапните информации, дронот ја погодил локомотивата на возот. Сите патници биле евакуирани, меѓу нив и 67 деца, без извештаи за повредени меѓу патниците. Украинската железница соопшти дека патниците биле пренесени кон Одеса, а службите за итна помош интервенирале на местото на нападот.
Нападот врз патнички воз со стотици цивили уште еднаш ја покажува природата на руската војна против Украина: систематско таргетирање на цивилниот живот, транспортот, енергетиката, пристаништата, железницата и секојдневната инфраструктура што им овозможува на луѓето да преживеат, да се движат и да останат поврзани со остатокот од земјата.
Овој напад има и јасна правна димензија. Патнички воз со стотици цивили не е легитимна воена цел. Напад врз таков објект, особено кога последиците се смрт на железнички работници и непосредна опасност за стотици патници, претставува уште еден пример за руското кршење на меѓународното хуманитарно право и за потребата од целосна одговорност.
Истата ноќ Русија изврши и поширок напад врз Одеската област и критичната инфраструктура на југот на Украина. Руски напад предизвикал пожар на пристанишната инфраструктура во Измаил, еден од клучните украински дунавски пристанишни центри за извоз на жито, а делови од градот останале без електрична енергија. Нападот дополнително ја зголемува загриженоста за безбедноста на украинскиот извоз и за глобалната прехранбена сигурност.
Украинските воздухопловни сили соопштија дека агресорот во текот на ноќта лансирал 133 беспилотни летала, од кои 111 биле соборени или неутрализирани. Дел од нападите биле насочени кон Одеската област, каде што беа погодени пристанишни и транспортни објекти.
Воените злосторства не застаруваат, а нападите врз цивилите не можат да се прикријат со руската пропаганда за „воени цели“. Зад секој напад стојат човечки животи, семејства, работници, деца, патници и цели заедници изложени на терор.
