Здружение на јавни обвинители: Писмото од Русковска го нарушува угледот и Етичкиот кодекс на јавните обвинители
Здружението на јавните обвинители на Република Северна Македонија остро реагира на отвореното писмо од јавниот обвинител Вилма Русковска упатено синоќа преку медиумите до странски амбасади и меѓународни организации, пренесува МИА.
Како професионално здружение, се посочува во денешната реакција од Здружението на јавни обвинители, со зачуденост го проследивме дописот за кој сметаме дека го нарушува угледот на јавнообвинителската функција и грубо го прекршува Етичкиот кодекс на јавните обвинители.
– Имено, како јавни обвинители не гледаме ниту една причина за ваков драматичен полноќен повик до меѓународни институции и дипломати, особено што ниту обвинителката Русковска, ниту останатите обвинители од Основното јавно обвинителство за гонење на организиран криминал и корупција во ниту еден момент не биле спречени самостојно да водат истраги за предмети во нивна надлежност, подвлекуваат од Здружението.
Меѓутоа, при постапувањето во предметите, и тие како и сите останати јавни обвинители, истакнуваат, мора да се водат од начелата на законитост и правичност.
ИЗЈАВА НА ДЕНОТ
„Ние плаќаме цена за нашата поддршка за Украина. За воената, хуманитарната и финансиската поддршка. За санкциите, кои резултираа со зголемена инфлација и повисоки цени во нашите земји. Но запомнете – цената што ја плаќаме може да се мери во пари. Цената што ја плаќа Украина се мери со човечки животи. Стотици убиени или ранети секој ден“, рече Столтенберг.
ФЛЕШ ВЕСТИ
ПРАВДА Директорот на Управата за финансиска полиција Арафат Муареми, во соопштение до медиумите, ја повикува јавната обвинителка Вилма Рускоска, доколку располага со сознанија и информации за сторен криминал, да ги докаже и на јавноста да и пласира обвинителен акт против него, а не празни и, како што вели, неосновани сознанија и информации, дискредитиријаќи ја во целост функцијата која ја извршува.
ГРАД СКОПЈЕ Скопјани нема да добијат брз автобуски транспорт (БРТ) во Скопје оти градските власти одбиваат да го реализираат проектот вреден 70 милиони евра, за кој веќе се обезбедени средства преку заемот од Европската банка за обнова и развој (ЕБОР). Инаку, претходното градско раководство во октомври лани го распиша меѓународниот тендер за изведба на првата БРТ линија од Ново Лисиче до Ѓорче Петров, со должина од 12,81 километри, пишува Мета.
ЕКОНОМИЈА Со денешната одлука на Регулаторната комисија за енергетика и водни услуги (РКЕ), од ноќеска на полноќ горивата поевтинуваат за два до три денари за литар, со што малопродажните цени на нафтените деривати се намалуваат во просек за 1,99 отсто.
ДИГИТАЛИЗАЦИЈА Владата на Република Северна Македонија на вчерашната седница ја разгледа и усвои и Информацијата за пристапување на Република Северна Македонија кон програмата Дигитална Европа – Digital Europe (DIGITAL), подготвена од Министерството за информатичко општество и администрација, информираат од владината прес служба.
ЕКОЛОГИЈА Помагаме во чистењето на дивите сметишта, но општините мора да ги обезбедат услугите и во најизолираните населби, истакна Насер Нурадини, министерот за животна средина и просторно планирање.
ВОЈНА ВО УКРАИНА
Во регионот на Доњецк, руски напаѓачи отворија оган на општинската автобуска станица во Торецк, при што загинаа осум локални жители, а четворица беа повредени, меѓу кои и три деца, изјави началникот на регионалната воена управа на Доњецк, Павло Кириленко, кој ја објави веста на Телеграм, пренесува Укринформ.
*
Вооружените сили на Украина продолжуваат да ги таргетираат руските воени упоришта, што веројатно ќе влијае на нивното воено логистичко снабдување во иднина, соопшти Министерството за одбрана на Обединетото Кралство во последното известување за ситуацијата во Украина, пренесува Укринформ.
*
Деновиве во нашиот информативен простор и на социјалните мрежи има многу извештаи за конфликтни ситуации и закани кои постојат на други географски места. Прво – Балканот, потоа – Тајван, сега можеби е Кавказ… Сите овие ситуации изгледаат поинакви, иако ги обединува еден фактор, а тоа е: глобалната безбедносна архитектура не функционираше. Ако функционираше, немаше да ги има сите овие конфликти, изјави украинскиот претседател Володимир Зеленски во синоќешното видео обраќање.
ГОВОР НА ОМРАЗА
Во интервју за ЦИВИЛ Медиа, проф. д-р. Иван Анастасовски зборува за говорот на омраза, дискриминацијата и национализмот на навивачките групи на трибините, но и надвор од спортските натпревари, односно на социјалните мрежи. За тесната спрега меѓу навивачките групи и политичките врвови, како и поврзаноста со полициските структури. На кој начин се мобилизираат и организираат.
Тој зборува и за последните инциденти и недоличното скандирање на натпреварот меѓу Шкупи и Динамо Загреб, како и на натпреварот ЦСКА Софија и Македонија Ѓорче Петров. Зборува и за хулиганизмот во Англија и како се стави ред, односно нулта толеранција за недоличното навивање и однесување…
Д. Муратов
