Министерот за надворешни работи на Саудиска Арабија најави „меѓународен сојуз“ за притисок за палестинска државност, на маргините на Генералното собрание на Обединетите нации, објавија медиумите во Ријад.
Принцот Фајсал бин Фархан рече дека „Меѓународната алијанса за спроведување на решението за две држави“ вклучува арапски и исламски земји, како и европски партнери, јавија саудиските медиуми без да дадат детали.
Војната во Газа ги оживеа разговорите за „решение со две држави“ за израелските и палестинските држави кои живеат во мир рамо до рамо, но аналитичарите велат дека целта изгледа понеостварлива од кога било.
Саудиска Арабија, најголемиот светски извозник на нафта и чувар на двете најсвети места на исламот, ги прекина разговорите со посредство на САД за признавање на Израел по избувнувањето на војната во Газа меѓу палестинските милитанти на Хамас и Израел.
Претходно овој месец, де факто владетелот на кралството, престолонаследникот Мохамед бин Салман, го заостри својот тон, експлицитно велејќи дека „независна палестинска држава“ е услов за нормализација.
Висок функционер на Организацијата за исламска соработка (ОИК) со седиште во Саудиска Арабија изјави дека новата коалиција „се состои главно од исламски и арапски членки на ОИК плус некои европски земји“.
„Ќе има состаноци во арапските и европските земји за да се разговара за практичното извршување на иницијативата и конференција подоцна оваа година во Ријад“, додаде функционерот, кој побара да остане анонимен.
Ирска, Норвешка и Шпанија го објавија своето признавање на палестинската држава во мај. Следеше Словенија, со што бројот на земји кои признаваат палестинска држава се искачи на 146 од 193 земји-членки на Обединетите нации.
