СДСМ се пред избор на шестиот партиски лидер, трет на непосредни избори кои следуваат по најлошиот изборен резултат во историјата на партијата.
Кој ќе го понесе товарот за „рехабилитација“ на СДСМ ќе се знае на 30 јуни. Во трка се четворица кандидати, сите познати во јавноста. Заедничко кај сите е дека партијата треба да се врати на социјалдемократијата и да се доближи до членството и граѓаните.
Славјанка Петровска
Враќање на социјалдемократијата, нов статут, ветинг за партиското раководство се дел од ветувањата на Славјанка Петровска.
„Очигледно дека заминувањето на Зоран Заев само по себе не беше решение, туку само купување време. Се промени само претседателот, но не се променија однесувањата кои ни штетеа“, вели пратеничката која ја бара довербата од членството.
На прашањата околу тоа на кој табор припаѓа досега одговараше дека со својот 24 годишен активизам во партијата е „дете на СДСМ“.
Сепак, на денешната прес конференција, Петровска ги повика противкандидатите в недела да не се одржат изборите за нов лидер на партијата и да се формира привремено партиско раководство кое дополнително ќе ги закаже внатрепартиските избори кога ќе се создадат услови за тоа
Петровска смета дека досегашниот изборен процес бил нефер и се осврна на неколку забелешки зошто треба да се одложат изборите. Како забелешка ја спомена регистрацијата на членството која не се вршела лично од самите членови, како и дека од некои од противкандидатите биле злоупотребени личните податоци на дел од членовите на партијата..
„Во определени општински организации се појавуваат одреден број гласачи кои не се дел, односно се само дел од членството на СДСМ, меѓутоа не ја направиле регистрацијата сами и не побарале тие да бидат регистрирани, значи некој друг користејќи ги алатките во нивно име ги регистрирал. Имав забелешка и за она што пред десетина дена се случи, но за тоа се уште немам одговор, тоа е злоупотребата на личните податоци од страна на еден од кандидатите, кога беа испраќани илјадници пораки користејќи ги тие податоци. Партијата започнала со некој процес на внатрешна истрага како е тоа стигнато, кандидатот дал одговор што за мене не е релевантен. Таков сериозен скандал не смее да биде премолчен, бидејќи тоа влијае кога имате пристап до базата на податоци на сите членови, а тоа го има само еден кандидат, тоа може да влијае сериозно и на процесот и на резултатот“, рече Петровска.
Јован Деспотовски
Јован Деспотовски вели дека по средбите со членството и теренските активности, може да се заклучи дека отворено се говори за состојбите, незадоволството и самите членови даваат конкретни идеи како да се реформира партијата во иднина. Според Деспотовски најголем интерес има околу кадровската обнова на партијата и како да се врати важноста на месните организации.
„Охрабрува тоа што луѓето отворено зборуваат, критикуваат, но и активно даваат свои предлози за промените кои ни претстојат. Тоа е здраво и суштинско, и јас сакам да слушам сè што имаат да ни кажат. Бидејќи ако не си ги кажеме сега работите какви што сè нема да можеме да влеземе во процесот на заздравување. Никој не треба да се ‘вознемирува’ од зборовите на членството и од критиките на луѓето. Напротив треба да ги слушаме и да постапиме така како што зборуваат ако сакаме да одиме напред,“ вели Деспотовски.
Венко Филипче
Според Венко Филипче, идниот претседател на СДСМ ќе има целосен легитимитет затоа што истиот го црпи од членовите. Според него, СДСМ е партија која на најдемократски начин бира претседател во легитимен и фер процес.
„Идниот претседател на СДСМ ќе има целосен легитимитет затоа што го црпи од членовите. СДСМ е демократска партија која уште еднаш тоа го потврдува преку организирање на внатрепартиски непосредни избори. Преку 23 илјади гласачи во недела ќе може да изберат кој сакаат да ја води партијата и ги повикувам масовно да го сторат тоа“, рече Филипче.
Тој кампањата ја оцени како фер и демократска и очекува во недела да се заокружи овој процес со легитимен избор на новиот претседател. Филипче уште еднаш се осврна на обединувањето како предуслов за успешно закрепнување на СДСМ и спречување на натамошни поделби.
„Јас останав доследен во ветувањето дека оваа кампања не треба и не смее да биде насочена кон никој од противкандидатите. Тоа само го слабее СДСМ и им дава материјал за напад на политичките противници кои гледаме дека тоа веќе го искористат. Ветив дека ќе се задржам на презентација на мојот концепт и обединувањето како предуслов за секој иден успех на партијата. Кој и да биде избран за претседател не смее понатаму да прави поделби во партијата. СДСМ оствари историски најслаб резултат и понатамошни поделби ќе го доведат опстанокот на партијата во прашање“, истакна Филипче.
Александар Бајдевски
За Александар Бајдевски, потребно е враќање на социјалдемократските вредности, слободата, правдата, солидарноста …
„Имајќи предвид дека сум долги години во СДСМ, од 1995 година, паметам години кога во нашата партија постоеше единство, другарство, солидарност, идеологија, заемна поддршка, како и мотив и желба за подобрување на состојбите како во партијата така и во државата. Тоа е она што ќе тежнеам да се врати преку моето работење“, пишува Бајдевски во својата програма.
И тој се залага за реконструкција и децентрализација на партијата за членовите да имаат поголемо учество во носењето на одлуките.
Реорганизацијата, вели, нема да биде брза, но има потенцијал тоа да се направи и да ја врати партијата како „водечка сила во државата“.
Првпат непосредни избори за претседател на партијата, социјалдемократите спроведоа во март 2021, кога Заев како единствен кандидат освои речиси 60.000 гласа.
За помалку од една година следуваа и вторите на кои победи Димитар Ковачевски откако Заев поднесе оставка по поразот на локалните избори во октомври 2021 година. Тој освои 37.649 гласа, а имаше двајца противкандидати. Еден од нив е и сегашниот кандидат Деспотовски за кого тогаш гласаа 3.319 членови. Трета беше Фросина Ременски со 2.836 гласа.
Покрај Заев и Ковачевски, досегашни претседатели на СДСМ беа и Бранко Црвенковски, Радмила Шекеринска и Владо Бучковски.
Инаку, очекувањата се дека „рехабилитацијата“ на партијата, без разлика кој и да победи, воопшто нема да биде лесен и брз процес.
Дамјан Варошлија
