Скопје, 30 ноември 2024
Македонската невладина организација ЦИВИЛ – Центар за слобода (Северна Македонија) и МЕДИУМСКИ ДИЈАЛОГ / Youth4Media од Северна Рајна-Вестфалија (NRW) организираат меѓународна конференција на 11-ти и 12-ти декември 2024 година под наслов „Одбрана на демократијата и човековите права во услови на војна, национализам и авторитаризам“ во државата партнер на NRW, Северна Македонија, објави владината веб страница на Северна Рајна-Вестфалија.
„Државната влада на Северна Рајна-Вестфалија (NRW) ја поддржува оваа важна меѓународна конференција. Настанот е дел од Неделата за човекови права на NRW, која вклучува различни формати на оваа тема. Северна Македонија и Северна Рајна-Вестфалија се поврзани како земји партнери од 2021 година“, се вели понатаму во официјалното соопштение.
На владината страница на NRW на германската публика ѝ се откриваат неколку детали за конференцијата во Скопје.
„Конференцијата ќе собере водечки експерти, креатори на политики, претставници на граѓанското општество и новинари од различни европски земји и од САД за да се осврнат на актуелните закани за демократијата и човековите права ширум светот. Бидејќи слободниот свет се соочува со нови и зголемени предизвици за основните демократски вредности, стандарди и практики – од ескалација на конфликти и пораст на национализмот до подемот на авторитарните режими – оваа конференција ќе биде важна платформа за споделување согледувања и давање препораки“, стои во соопштението објавено на владината веб страница на Северна Рајна-Вестфалија.
Понатаму, во соопштението се истакнува дека фокусот на овој голем меѓународен настан во Скопје, е на заштита на човековите права, демократската отпорност и слободата на медиумите. Во двата дена се одржуваат панел дискусии, работилници и формати за вмрежување.
Исто така, во соопштението се промовира и дека заинтересираните можат да го следат настанот онлајн, со линк во живо на официјалната веб страница на конференцијата: https://defendingdemocracy.civilmedia.mk/.
Во соопштението се открива и дека Министерот за Европа на Северна Рајна-Вестфалија, Лимински, ќе го отвори главниот ден на настанот на 12 декември со видео обраќање.
ЦИВИЛ & MEDIA DIALOGUE / Y4M
