Селмани: Сакам во името на ЗНМ најостро да ја осудам практиката на забранување на било какви коментари на новинарите на ТВ Телма од директорот и главниот уредник Атанас Кировски. Убедени сме дека ваква општа , арбитрарна и селективна забрана на било какви коментари на новинарите на социјалните мрежи за наводно зачувување на неутралноста на телевизијата претставува кршење на слободата на говорот што во Македонија е загарантирана со Уставот, а и со меѓународните документи.
За нас ова е еклатантен пример на цензура којашто има намера да поттикне самоцензура кај новинарите и на некој начин да влијае на начинот на нивното известување во телевизијата, а не само на пишувањето на социјалните мрежи.
Ограничувањето на правото новинарите да коментираат на социјалните мрежи во светските медиуми во слободните земји, се практикува во јавните сервиси каде што повеќе се води сметка да бидат неутрални кон политичките актери. Меѓутоа тоа е дефинирано, напишано и објавено и тоа важи селективно за сите и во тие документи јасно е објаснето во кои случаи важи тоа ограничување.
Господинот Кировски, им забранува на новинарите да коментираат, а тој самиот коментира. Тоа покажува дека има двојни аршини. Не може стандардите да важат за новинарите, а за него да не важат. Ако веќе сака да воведува некои правила. Не може тоа да важи генерално, мора да се појасни во тие правилници ако телевизијата веќе сака да воведе таква пракса. Мора да ги напише, прецизира и објави за да ние знаеме на што сме кога гледаме ТВ Телма.
Новинарите од Телма пред да бидат вработени треба да знаат кои се правилата на игра во Телма. Не можете отпосле да им кажувате на луѓето што смеат, а што не смеат. Ако треба тие правила ќе се стават и во работните договори. Ако новинарите прифаќаат такви ограничувања, во ред, ако не има имаат право на избор.
Ваквиот начин на кој се обидува да се воведат некои стандарди на однесување на новинарите апсолутно е неприфатливо и не може да придонесе за некој неутралност на новинарите и за зачувување на угледот на телевизијата пред јавноста.
Јас искрено не верувам како новинар во таа неутралност. Новинарите треба да имаат став, но прашањето е какви аргументи имаат да ги застапуваат тие ставови. Ние не сме само држачи на микрофони и пренесувачи на мислењата на политичките актери. Прашањето е кои се нашите аргументи за да ги поткрепиме тие ставови. Во спротивно новинарството ќе стане безлична професија. Ако ние немаме став, тогаш што кажуваме?
Затоа мислам дека ваквото однесување на Кировски не е зачувување на интегритетот и неутралноста на телевизијата туку праќа јасна порака дека новинарите треба да се прилагодат на неговиот вкус на поимање на новинарството. Всушност тоа е воведување на некој вид на цензура и самоцензура.
Камера: Дехран Муратов
Монтажа: Биљана Јордановска
Преземање на содржините НЕ Е ДОЗВОЛЕНО, освен со писмена дозвола од ЦИВИЛ. Повредата на авторските права е забранета со закон.
Услови за користење, авторски права и заштита на приватноста
