Севернокорејскиот лидер Ким Џонг Ун ѝ понудил на Москва „безусловна поддршка“ во војната во Украина, според извештаите на државните медиуми.
Во разговорите со рускиот министер за надворешни работи Сергеј Лавров во Северна Кореја, Ким рекол дека Пјонгјанг стои зад „сите мерки преземени од руското раководство“ за справување со „коренот на украинската криза“, пишува Би-би-си.
Западните претставници веруваат дека Пјонгјанг испратил околу 11.000 војници во Русија во текот на изминатата година за да се борат против Украина.
Според севернокорејската државна новинска агенција KCNA, Ким и Лавров се сретнале во саботата во „атмосфера полна со топла другарска доверба“.
Севернокорејскиот лидер, исто така, изразил „цврсто верување дека руската армија и народ сигурно ќе победат во остварувањето на светата кауза за одбрана на достоинството и основните интереси на земјата“.
На Телеграм, руското министерство за надворешни работи објави видео на кое се гледа како двајцата мажи се ракуваат и се поздравуваат со прегратка.
Обновената воена поддршка на Северна Кореја за Русија доаѓа откако американскиот претседател Доналд Трамп ги продолжи воените испораки за Украина, по кратка пауза.
Трамп изјави за NBC News во четврток дека склучил договор со НАТО за САД да испратат системи за воздушна одбрана „Патриот“ во Украина преку алијансата, по бранот руски воздушни напади.
Пјонгјанг првпат јавно призна дека испратил војници во Русија во април, неколку месеци откако Украина и Западот го открија големото движење на војници од Северна Кореја кон руско-украинската фронтова линија.
Ким потпиша договор со рускиот лидер Владимир Путин во јуни минатата година, согласувајќи се да се поддржуваат едни со други ако која било од земјите се справува со „агресија“.
Освен војници, Северна Кореја вети и дека ќе испрати илјадници работници за да помогнат во обновата на рускиот регион Курск, кој е разурнат од војната, изјави минатиот месец шефот на безбедносните сили на Москва, јави Би-би-си.
