Американскиот државен секретар Ентони Блинкен изјави дека е тажен поради смртта на невините Палестинци во израелско-палестинското насилство, за време на средбата со палестинскиот претседател Махмуд Абас на окупираниот Западен Брег.
Дозволете ми да го изразам моето сочувство и тага за смртта на невините палестински цивили кои ги загубија животите во ескалацијата на насилството во текот на изминатата година, истакна Блинкен во седиштето на палестинските власти во Рамала на Западниот Брег, палестинска територија окупирана од Израел во 1967 година.
Минатата година, 235 луѓе беа убиени во израелско-палестинските конфликти, меѓу кои речиси 90 проценти беа Палестинци, покажува статистиката на француската новинска агенција заснована на официјални израелски и палестински извори. ОН процениле дека бројот на жртви на Западниот Брег минатата година бил најголем од 2005 година.
Израел во некои случаи призна дека неговите сили по грешка убиле цивили во, како што ги нарекува, нападите против тероризмот. „Палестинците и Израелците имаат зголемено чувство на несигурност, стравот се шири се повеќе и повеќе во нивните заедници и во нивните места за богослужба“, изрази жалење Блинкен во Рамала.
Сметаме дека е важно да се усвојат мерки за деескалација, да се запре насилството и да се намалат тензиите, додаде тој, повикувајќи да не се преземе ништо што би можело да го загрози решението за две држави, израелска и палестинска. Тој ги спомна проширувањето на израелските населби, легализацијата на илегалните населби (што владата не го одобри), уривањата и иселувањата што ги спроведе израелската влада.
Блинкен изјави и дека жали што се стеснува хоризонтот на надеж за Палестинците. Патувањето на шефот на американската дипломатија, кое е долго планирано, започна во неделата во Египет, а завршува вечерва. Доаѓа по неколкудневни насилства обележани со палестински напади во Источен Ерусалим во кои загинаа седум лица и смртоносни напади на израелската армија на Западниот Брег.
