пишува: ПЕТРИТ САРАЧИНИ
Драги граѓани на Република Македонија!
Знам дека многумина ме обвинуваат, а и веќе ви е познато дека во Белизе, земја-пријател на Република Македонија, а и во неколку други пријателски земји на Република Македонија, ги вложив парите на Македонскиот народ, на сметката на синот на Република Македонија.
Сега ќе ви кажам и зошто треба да бидете горди на вашиот водач, синот македонски, кој во име на славното минато на Република Македонија, ја обезбеди својата светла иднина надвор од Република Македонија!
Но не само својата иднина. На денешен ден, 8 септември Денот на независноста на Република Македонија, не заборавајте и бидете благодарни дека Тој не ги остави со куси ракави ниту неговите први братучеди, кумови, другари, соборци, сопартијци во Република Македонија!
Некому полна сметка, егзотични дестинации, тендер, милиони, некому платичка во администрација, некому сендвич… Битно, секој, а најчесто незаслужено – без соодветна, диплома, знаење, голи и боси, сите добија по нешто од богатството на Република Македонија!
А најбитно од сѐ, е дека лозата на пастирот македонски е вечно обезбедена, а богами и генерации од сите оние што беа дел од нашето владеење, во кое Република Македонија цветаше, беше меѓу првите во светот во дуинг бизнис, додека ние бевме меѓу првите по шалтерите на белосветските банки, а вие први во ред за сендвич или друга закуска по митинзи, пифтијади и други забави за македонскиот народ на Република Македонија!
Па дури и тие стотици илјади кои се отселија од Република Македонија, немаат право да се жалат, отидоа од убаво на уште поубаво. Нека ми бидат благодарни што им ги отворив очите. Во Република Македонија.
Посебна приказна се невладините, непартиските активисти, „соросоидите“ во Република Македонија. Тие најмногу жалат по мене. Додека бев јас на власт, имаа проекти, пари, немало демократија, доволно беше само да ме плукаш и да добиеш проект во Република Македонија. Сега имаат демократија, ама немаат лесни пари, дојде време нешто и да работат во Република Македонија!
Истото важи и за медиумите, особено за оние „соросоидните“ во Република Македонија. Комуњарите не се моето мвро-вмро и јас да плаќаат дарежливо, проекти има сѐ помалку, а пари од пазарот нема, затоа што го уништивме успешно во Република Македонија, а и работевме многу на оглупавување на народот, за да нема иднина за сериозни медиуми во Република Македонија!
Но, фала богу (и на сметките и парите на народот на Република Македонија) тоа не им се случува на медиумите и новинарите кои сѐ уште се во моја милост и контрола. Ви фалат милионите од државните реклами? Ви фали да добиете готова агенда, наместо да се мачите сами да смислувате вести со часови? Ви фали безбедноста и заштитата на кондомот од суровата реалност во која ќе треба да бидете вистински медиуми и новинари? Ви фали да не добивате изјави од премиерот ако не сте од послушните што добиваат не само одговори туку и готови прашања, што сега ги одбивате изјавите на Заев? Е, ви фали…
Па и за она што го имате денес како општа состојба, сите граѓани на Република Македонија без оглед на вашата припадност (освен сексуалната) сум заслужен јас!
Кога веќе го спомнав, почнете од Заев. Да не бев јас и да не попуштев, Заев никогаш немаше да стане премиер, а и за 27-ми ви кажав, да имаше наредба, ќе го немаше… во Република Македонија.
Освен тоа, на овој празник, треба да бидете благодарни во Република Македонија и за СЈО, и за Катица Јанева, и за блокадите во Собранието и во судскиот систем, за референдумот и уставните амандмани, за „Рекет“, за разноразните пожари и пожарчиња, за бојкотерите и ботовите, јавни и тајни. Ви оставив изговор за секој криминал, за сѐ што направивме во последната деценија за нас и за Република Македонија. Што и да ви речат, за што и да ве обвинат, вие бап – Република Македонија! Изговор што го посадив, и ќе ве дели успешно уште неколку генерации во Република Македонија!
Да не должам (а должам сѐ повеќе во последно време), да не сум јас, вие ќе го немате овој живот во Република Македонија! Да не сум јас и парите на македонскиот народ на моја сметка, а богами и некои мои другари од пријателски земји на Република Македонија, ќе имавте и цензус на референдум и одамна ќе ја заборавевте Република Македонија!
Затоа, македонски народе, да живеам на слобода јас! Затоа што дур сум на слобода јас, ќе живее и Република Македонија! Да живее Република Македонија!
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.