Министерот за надворешни работи на Украина, Андриј Сибига ја потсети светската јавност дека Русија во моментов држи илјадници украински воени и цивилни заробеници, присилно депортирани деца.
„Во моментов, во Русија се задржани илјадници украински воени и цивилни заробеници, присилно депортирани деца“, објави министерот Сибига.
Тој открива дека на заробениците и присилно депортираните деца им се ускратени основните права, утврдени со меѓународните закони, како што е контакт со меѓународни набљудувачи и медицински лица.
„Москва им го ускратува правото на меѓународните набљудувачи и медицински лица за соодветен пристап до нив, што е гарантирано со меѓународното право. За жал, постоечките меѓународни инструменти не можат да ги заштитат правата на нашите луѓе“, алармира првиот човек на украинската дипломатија.
Сибига соопшти и дека тимот на претседателот Володимир Зеленски работи на враќање на нашите луѓе и обезбедување на соодветен третман кон нив.
„На министерската конференција оваа недела во Канада, една од земјите изрази подготвеност да стане држава-заштитничка според Женевските конвенции за помош на Украинците во Русија. Работиме на тоа да стане реалност“, најави министерот Сибига.
На 30 октомври, во Монтреал, Канада, министерот за надворешни работи на Украина Андриј Сибига учествуваше на отворањето на министерската Конференција за Човечката димензија посветена на имплементацијата на четвртата точка од Формулата за мир на претседателот Зеленски, „Ослободување на затворениците и депортираните“.
Целта на тематските конференции за точките од Формулата е да се подготви заедничка рамка за мир за да се стави крај на руската агресија во согласност со меѓународното право.
„Во претходните недели беа одржани 8 тематски конференции во соработка со нашите партнери и луѓе со добра волја од целиот свет. Конференцијата во Монтреал е деветта и последна. Тоа го отвора патот за Вториот мировен самит“, соопшти Министерството за надворешни работи на Украина на 31 октомври.
На конференцијата, Андриј Сибига рече дека денес, повеќе од кога било, е важно да се биде на вистинската страна на историјата со вложување напори за спроведување на Формулата за мир, особено нејзината четврта точка за ослободување на затворениците и депортираните.
Министерот за надворешни работи изрази благодарност до Канада и Норвешка за нивното лидерство во промовирањето на Формулата и нагласи дека таквото лидерство и силните одлуки на партнерите сега се од клучно значење.
„Иако сегашниот меѓународен систем ја покажа својата неспособност да ја постигне оваа цел, убеден сум дека нашите заеднички напори и посветеност на овој случај нѐ доближуваат до сеопфатен, праведен и траен мир. Денес, на светот му требаат силни одлуки. Ништо не може да го оправда геноцидните акти на Русија против украинските деца“, нагласи министерот.
Андриј Сибига додаде дека Русите не само што киднапираат украински деца, туку и им го одземаат нормалното детство.
Министерот за надворешни работи истакна дека „мирот по секоја цена значи капитулација, окупација, депортација и тортура. Украина никогаш нема да се согласи со мировните иницијативи развиени без Украина и зад нејзиниот грб, што ќе ги остави сторителите неказнети“.
Подготви: Џ. Д.
