По вчерашниот инцидент кога ексминистерот за економија Беким Незири, сега вработен во М-НАВ, заедно со 8 членови на ДУИ од Чаир упаднале во институцијата и нападнале вработени во радарската соба каде што е сместена обласната Контрола на летање и каде што се водат прелетите, доцна синоќа Владата информираше дека на иницијатива на премиерот се донесени одлуки за итно разрешување на постоечката ситуација во М-НАВ кои ќе бидат реализирани веќе на следната владина седница.
Како што информираат од Владата, на следната седница, закажана за вторник, 09.01.2024 година, за решение на постоечката ситуација ќе бидат предложени и донесени неколку одлуки:
- Целото раководство и сите членови на Управниот одбор да бидат разрешени,
- Да се отвори итна постапка за избор на нови членови на раководство и Управниот одбор во јавен, транспарентен и законски пропишан процес.
Дополнително, како што се вели во соопштението, се очекува Ковачевски да го повика Јавното обвинителство, ДКСК, Државниот завод за ревизија, Финансиската полиција и меѓународните тела за контрола на авио- сообраќај да направат целосна ревизија на досегашното работење на М-НАВ, во интерес за безбедноста на македонското небо и функционирањето на патничкиот и воениот авио-сообраќај.
Од друга страна, членството на Струковиот Синдикат на контролорите на летање – ССКЛ доцна синоќа одржа вонреден состанок, на кој одлучиле дека доколку директорите на Македонската навигација не си поднесат оставки или Владата не ги разреши на првата наредна седница закажа во вторник, следниот ден (10 јануари) ќе стапат во штрајк со затворање на воздушниот простор.
Како што соопшти претседателот на Синдикатот, Александар Тасевски за вчерашниот инцидент веќе се известени сите меѓународни воздухопловни институции како и синдикати и здруженија на контролори на летање од Европа и очекуваат претставници од истите да пристигнат наскоро како дополнителна помош и поддршка.
М. Д.
