Самата одлука да се одложи пописот, по средбата на политичките лидери на двете поголеми партии, покажува дека ние имавме политичка, а не статистичка операција, вели Суад Скендери од Ромалитико, и дел од иницијативата АВАЈА, на панелот „Помалите етнички заедници помеѓу статистиката и политиката“ во организација на ЦИВИЛ.
„Пописот за помалите етнички заедници, посебно за Ромите е политичко прашање, а не само обична статистичка операција, бидејќи пописот всушност претставува алатка за поголемите етнички заедници за демографски инжинеринг.
По 2001, односно по Рамковниот договор сите политики се креираат според застапеноста на заедниците. Затоа е политичко прашање, бидејќки колку е поголема бројката толку е поголема застапеноста во државната и јавна администрација и во другите установи“, потенцира Скендери.
Тој вели дека според сите податоци, во Република Северна Македонија има од 80.000 до 100.000 Роми.
Скендери истакна дека во текот на пописот наидоа на низа проблеми.
„Во Гостивар еден попишувач ги фотографирал личните карти на граѓаните и дома ги пополнувал податоците. По реакцијата на АВАЈА тој попишувач беше суспендиран и во тој реон се повтори попишувањето, каде што живеат Макдеонци, Роми и Албанци.
Ист таков случај е регистриран и во Струмица каде што живеат Турци и Роми, каде што пред една продавница попишувачот ги фотографирал личните карти и податоците ги внесувал дома.
Во Велес попишувачката беше придружувана со агитатори од турска етничка заедница и одеа од куќа во куќа да попишуваат.
Во Радовиш имавме пријави од граѓани дека се злоупотребува слободата на граѓанинот, односно се вршеше притисок и заплашување“, нагласи Скендери.
Тој вели дека сите овие случаи ги пријавиле во Државниот завод за статистика, но не се задоволни од реакцијата.
Скендери додава дека цело ромско маало во Топаана се попиша последниот ден од пописот, и дека имаше доста пријави дека попишувачите воопшто не беа кај некои домаќинства. Тој вели дека од ДЗР добиле ветување дека со вмрежување на податоците сите граѓани ќе бидат попишани.
„Се согласувам дека тоа може да го изведат, но како ќе го вмрежат етничкиот концепт, нели е тоа чувство? Нели може денес да бидам едно, утре да бидам нешто друго? Етничкото чувство, односно чувството на припадност никој не може да ви го наложи“, истакна Скендери.
Тој додаде дека за време на пописот иницијативата АВАЈА спроведе кампања „Горди Роми во Северна Македонија“.
Панелот го водеше Дехран Муратов
обработка на текстот: Дијана Тахири
камера: Атанас Петровски
монтажа и реализација: Ариан Мехмети
