Има мал прогрес во комуникацијата меѓу Собранието и граѓанските организации, но потребно е да се работи и со едните и со другите. Граѓанските организации, кои имаат познавања од областа со која се занимаваат, не знаат како тоа да го преточат во конкретен предлог-закон, а пратениците немаат премногу желба да се отворат кон јавноста.
Од Фондацијата за демократија на Вестминстер, која во изминатите две години го спроведе проектот „Граѓаните во Собранието“ велат дека проблемот е и кај граѓанските организации и кај пратениците.
– Од една страна се граѓанските организации каде генерално се забележува дека иако се тие познавачи на темата и се засеганти со проблемот кој го застапуваат, сепак, не знаат како тоа да го преточат во конкретен предлог закон и тоа ефективно да го искомуницираат со пратениците. Од друга страна се пратениците со кои треба да се работи на воспоставување на пракса и увидување на користа од искористување на експертизата на НВО за креирање на законските решенија, изјави Ивана Петкуќеска од Фондацијата за демократија на Вестминистер.
Според Гордан Георгиев, поранешен пратеник и експерт во проектот, прогресот во комуникацијата меѓу Собранието и граѓанските организации е скромен затоа што Парламентот има конзервативна структура и пратениците немаат премногу желба да се отворат кон јавноста, но со тек на време ќе се зголемува интересот кај граѓаните да се вклучат во работата на Парламентот, а пратениците ќе имаат позитивен фитбек.
Актуелниот пратеник Павле Богоевски, кој доаѓа од невладиниот сектор, смета дека проблемот е во комуникацијата меѓу граѓанските организации и пратениците.
– Патот од граѓанска иницијатива до конкретен законски текст не е ниту брз, ниту едноставен, ниту може да биде направен преку ноќ. Невладините организации ќе го направат својот предлог и потребните истражувања, но на крајот на денот сепак треба да ги убедат пратениците дека нивниот предлог е оној што треба да биде ставен во законскиот текст, вели Богоевски.
Од Фондацијата за демократија на Вестминистер велат дека има механизами за учество на невладиниот сектор во Собранието и оти сега постои позитивен момент којшто треба да се искористи за да се надоградат овие механизми.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
