Три физички и три правни лица се осомничени во случајот „Труст“ што денеска на прес-конференција го објави Специјалното јавно обвинителство. Конзорциум составен од три фирми, со фалсификувана документација, добивал тендери и со тоа се здобил со противправна корист во износ од над милијарда денари или околу 17 милиони евра, соопшти денеска обвинителката Фатиме Фетаи.
Таа објасни дека меѓу доказите се вкупно три прислушувани телефонски разговори, од кои два не се објавени во јавноста.
https://www.facebook.com/civil.mk/videos/1221869891264811/
„Нивната содржина упатува на сомнение во јавната набавка за ископ на јаловина и јаглен во Суводол – РЕК Битола“, рече Фетаи.
Таа додаде дека во текот на денот ќе поднесат барање до судот за притвор на две осомничени лица.
Набавката по тендерот се случила во текот на 2011 година. На тендерот победил конзорциум од три фирми: првоосомничен е управителот на фирмата „Транс Мет“ ДО од Скопје, второосомничен е застапникот на „Силекс Неметали СТ“ ДООЕЛ од Кратово, а како третоосомничен се јавува управител на „Вато“ ДО од Студеничани.
Како што рече Фетаи, сите тројца се осомничени дека „свесно ја нарушиле постапката за јавна набавка и му овозможиле на конзорциумот добивка од повеќе милиони евра“.
Клучна за случајот е дробилицата за ископ на јаловината од РЕК Битола која била предмет на набавката. Според СЈО, учесниците на тендерот приложиле невистинита документација за нејзиниот капацитет, но и покрај тоа, Комисијата за јавна набавка и стручната комисија оцениле дека конзорциумот ги исполнува условите.
Специјалната јавна обвинителка, Катица Јанева истакна дека ја прошириле истрагата под кодно име „Титаник“, против 17 нови лица, за кривични дела против изборите и гласањето, за кои постои основано сомневање дека се сторени во периодот од 2011 до 2014 година, од кои петмина од осомничените лица делувале како создатели на групата. Се работи за функционери во власта, а останатите осомничени се членови на групата, кои се вработени како службени лица во повеќе државни органи. Основаното сомневање произлегува од повеќе необјавени аудио записи, како и од поголем број на материјални докази.
Обвнителката Ленче Ристоска рече дека додека ги испрашувале граѓанките во Охрид кои биле донатори за изборите, неколку претставници на одредена партија имале состанок со обвинителите на СЈО, на кои им упатиле закани во присуство на началникот на СВР Охрид.
„Не знам како стигнаа податоците до тие луѓе, кои имаа список – точно кој луѓе ќе бидат викнати на разговор. Ние немавме список од граѓаните, кој е припадник на која политичка партија, туку постапувавме според доказите што ги имавме. Против нив ќе бидат поднесени соодветни пријави“, истакна Ристовска.
Дехран Муратов
