Собранието вчера ја почна процедурата за менување на Законот за Влада, со цел да го укине моделот на техничка влада кој се избира 100 дена пред избори. Со 67 гласа „за“, пратениците ја утврдија потребата од донесување на измените по скратена постапка, што претставува прва фаза од процесот. Владејачката партија, аргументира дека овој механизам е нефункционален, финансиски неоправдан и дека институциите се веќе доволно стабилизирани за да функционираат во нормален демократски поредок. Според власта, овие реформи се дел од поширока визија за одговорна држава, ослободена од привремени политички компромиси од минатото.
Премиерот Христијан Мицкоски се појави во јавноста со оваа идеја на почетокот на година, а свикуваше и лидерски средби на оваа тема.
ЦИВИЛ – Центар за слобода, како организација за човекови права со дводецениско искуство во изборниот мониторинг и изборните реформи, ја оцени оваа иницијатива како обид за укинување на демократски механизам за контрола на власта и спречување на изборните кражби.
Ставот на ЦИВИЛ и во јануари и откако почна процедурата во Собранието за носење на тој закон по скратена постапка, останува ист. Во анализата објавена на 8 јануари, се оценува дека „ова не е само дебата за модел на влада, туку тест за демократската зрелост на државата, која во пракса покажува дека ја нема“.
Претседателот на ЦИВИЛ, новинарот и аналитичар Џабир Дерала на 14 јануари објави остра колумна со наслов „Мицкоски во координација со Мицкоски: Како демократската заштитна мерка се укинува од оние поради кои е воведена“.
„Може да се очекува дека пропагандата на власта ќе го претстави укинувањето на техничката влада како модернизација. Во реалноста, тоа е рецентрализација и структурно ќе ги ослаби демократските процеси, особено изборите. Уште попрецизно, Мицкоски отстранува една од малкуте преостанати мерки за структурна контрола врз извршната власт токму во најчувствителниот демократски момент: изборите.
И тоа се случува во услови кога јавната доверба останува ниска, медиумската независност е ранлива, политичката поларизација висока, а меѓународната загриженост за демократско назадување во регионот расте“, напиша Дерала.
Во вчерашното соопштение, СДСМ излезе со ставот дека „не се создадени услови за укинување на техничката влада, единствениот механизам за некаква контрола на изборниот процес и мора да остане“. За денеска е најавена прес конференција на претседателот на СДСМ, Венко Филипче.
Мониторинг тимот на ЦИВИЛ ќе ја следи оваа дебата и ќе го претстави ставот на организацијата пред јавноста со цел да помогне во расветлување на мотивите и значењето на овој процес.
Б. Јордановска
