Додека официјален Брисел бара истрага за наводите за полициско насилство врз демонстрантите во Србија, нема официјални изјави од Европската народна партија, најголемата политичка група во Европскиот парламент, чиј придружен член е Српската напредна партија (СНС), пишува РСЕ на српски јазик.
Европската народна партија ги собира популарните и конзервативните партии од десниот центар од цела Европа, а СНС, како партија од земја која не е членка на ЕУ, е нејзин придружен член од 2016 година.
Придружните членови имаат исти права како и полноправните членови при гласањето во Собранието и Конгресот, но не и за прашања поврзани со политиките на Европската унија.
Синиша Вуковиќ, професор на Универзитетот Џонс Хопкинс во Вашингтон, за Радио Слободна Европа изјави дека Европската народна партија често е амбивалентна кога станува збор за „падот“ на демократијата во Србија.
„Со оглед на тоа дека станува збор за политичка коалиција на десничарски партии кои се идеолошки блиски само на хартија, сосема е разбирливо дека приматот секогаш ќе има прагматични ставови кои имаат за цел да постигнат и одржат политичко влијание во Србија, во однос на какво било принципиелно инсистирање на демократските стандарди“, смета Вуковиќ.
Немања Тодоровиќ Штиплија, извршен директор на Центарот за современа политика од Белград, за РСЕ/РЛ изјави дека позицијата на СНС во рамките на Европската народна партија била поткопана уште порано, исклучиво поради односите со Русија.
„Но, Европската народна партија е многу ригидна кога станува збор за промени во политиката и се залага за своите членови, во овој случај и за СНС. Постои геополитичка позиција – подобро е СНС да биде со нас отколку со Русите“, вели тој.
Србија, иако е кандидат за членство во Европската унија, одбива да ги почитува санкциите против Русија, и покрај повиците од Брисел, пишува РСЕ.
Ниту овој месец, во јули, Србија не ги почитуваше рестриктивните мерки на Европската унија кон Русија поради војната во Украина. Станува збор за одлуката на ЕУ да ги продолжи санкциите против Русија до 31 јануари 2026 година.
Во Србија, блокадите на факултетите предводени од студенти траат со месеци, а во последните денови, граѓани и студенти блокираат патишта барајќи предвремени парламентарни избори. Властите ги осудуваат блокадите, нарекувајќи ги антивладините протести обид за „обоена револуција“.
Комесарката за проширување на Европската Унија (ЕУ), Марта Кос, на 3 јули објави дека ЕУ ги следи извештаите за прекумерна употреба на сила против антивладините демонстранти во Србија.
„Очекуваме брза, транспарентна и веродостојна истрага за наводите за прекумерна употреба на сила (од страна на полицијата)“, се наведува во соопштението на Делегацијата на ЕУ во Србија.
Сообраќајните блокади во градовите низ Србија започнаа откако студентите во блокадата повикаа на граѓанска непослушност по митингот на 28 јуни во Белград.
Д. Т.
