Во Казахстан е уапсен поранешниот шеф на Националната безбедност
Поранешниот шеф на Комитетот за национална безбедност на Казахстан, Карим Масимов е уапсен под обвинение за предавство. Тој беше сменет од функцијата како последица на немирите што ја потресоа земјата. Според локални медиуми, приведени се уште неколку други лица блиски до него. Повеќе детали засега не соопштуваат казахстанските власти.
Блинкен за руската војска во Казахстан: Кога Русите се во вашата куќа, тешко е да ги истерате
Американскиот државен секретар Ентони Блинкен изрази загриженост за пристигнувањето на руски војници во Казахстан, нагласувајќи дека тешко ќе се повлечат.
„Лекцијата од поновата историја е дека кога Русите се во вашата куќа, понекогаш е многу тешко да ги истерате“, предупреди државниот секретар на прес-конференција во Вашингтон. Казахстан беше погоден од најжестоките протести откако земјата стекна независност од Советскиот Сојуз во 1991 година, при што загинаа десетици демонстранти. Протестите почнаа во западниот дел на земјата поради наглото поскапување на горивата, но набрзо се проширија и укажаа на пошироко незадоволство од состојбата во земјата, со која иста партија владее од стекнувањето независност.
Москва реагира на изјавата на Блинкен
Според официјална Москва, со оваа изјава Блинкен на многу подмолен начин го коментирал „апсолутно легитимниот одговор на ОДКБ на повикот на раководството на Казахстан со цел да се даде поддршка во обезбедувањето на безбедноста на државата“.
„Ако Ентони Блинкен толку многу ја сака историјата, тогаш имајте го на ум следново – кога Американците влегуваат во вашата куќа, ретко кој останува жив без да биде ограбен и силуван“, се вели во соопштението.
САД одобрија доброволно заминување на дел од персоналот на конзулатот во Казахстан
САД соопштија дека им дозволиле на службениците во нивниот генерален конзулат во казахстанскиот град Алмати кои не извршуваат витални функции, како и на семејствата на персоналот на мисијата, ако сакаат да заминат, поради вонредната состојба во Казахстан.
„На 7 јануари 2022 година, Стејт департментот одобри доброволно заминување на вработените од Генералниот конзулат во Алмати и членовите на семејствата“, се вели во соопштението.
„Американските граѓани во Казахстан мора да бидат свесни дека насилните протести може сериозно да влијаат на способноста на американската амбасада да обезбедува конзуларни услуги“, соопшти Стејт департментот.
Руската пропагандна машинерија во служба на властите на Казахстан
Освен со инспраќање на руската војска во Казахстан, на состојбата во оваа поранешна советска република, Русија реагира и со вклучување на својата пропагандна машинерија во служба на тамошните власти.
Руската агенција РИА Новости вчера пренесе вест на локалните медиуми во Казахстан дека два приватни авиона, наводно на семејеството Назарбаев, слетале на аеродромот „Манас“, во главниот град на Киргистан, Бишкек, од кои едниот бил од Северна Македонија. Македонското МВР и Македонската Агенција за цивилно воздухопловство (АЦВ) веднаш ги демантираа овие наводи на руската агенција , оценувајќи ги како дезинформација.
Германија го прекина извозот на оружје во Казахстан
Германија го прекина извозот на оружје во Казахстан поради тамошните немири, јави ДПА. Преземени се неопходни чекори за да се спречи извозот на таква стока во централноазиската република. Минатата година беа издадени 25 дозволи за испорака на оружје за Казахстан во вкупна вредност од околу 2,2 милиони евра.
Тоа е релативно ниска сума, но прекинот на овој вид извоз се сметаше за неопходен со оглед на моменталната ситуација во таа држава. Алмати, најголемиот град во Казахстан и негов економски главен град, со денови е сцена на немири.
Репортер на „Би-Би-Си“: Најголемиот град во Казахстан,Алмати е како сцена од филм за апокалипса
Репортер на „Би-Би-Си“, Абдуџалил Абдурасулов, во извештајот наведе од најголемиот град во Казахстан, Алмати, вели дека изгледа како сцена од апокалиптичен филм. Додека се возел низ градот во петокот рано наутро, во воздухот сè уште се чувствувал мирисот на запалените возила . Наоколу имало малку минувачи бидејќи луѓето се плашат да излезат на улица.
Армијата и полицијата ги блокираат клучните делови во градот каде биле централните точки на националните протестите против владата.. Кога им се приближил на војниците на главниот плоштад, тие викале кон него и неговите колеги и испукале предупредувачки истрели во воздух.
Улиците на градот, предходно преполни со граѓани, зеленило и места кои нудат храна и пијалок, сега се празни, со ограбени или уништени продавници и банки.
Голем дел од штетите има во реонот на главниот плоштад, каде што демонстрантите започнаа масовните протести. Нападнати се околните згради во кои се наоѓаат медиумите, а опожарена е и канцеларијата на градоначалникот и сега таму е се црно, зафатено од црн чад.
Д.М
