Повеќе медиуми објавија ист дезинформирачки наслов по емисијата „Топ тема“ на 20.12.2021, на којa гостуваа двајца советници во од Советот на Град Скопје. Но ова не беа единствените дезинформации што произлегоа од ова соочување.
Насловот „Андоновски: Сѐ што вети Арсовска исполнува, а Шилегов никој ништо не го праша 4 години“ го објави Инфомакс, идентичен наслов објави и Курир, а истиот наслов го објави и Опсервер, како и порталот Весник и порталот Вечер. Порталот Нетпрес, пак, го објави како наслов истото тврдење, без да му го атрибуира на политичарот Андоновски.
Но, да видиме што точно кажа советникот Андоновски, откако наброја дел од ветувањата на Арсовска за првите 82 дена од мандатот, и како реагираше водителката на Топ тема:
„Од тука можам да видам дека кога давате ветувања, тие се реализираат. Ништо налик, на пример на ветувањето за мост, нов тунел под Кале… Четири години Петре Шилегов не беше прашан за тунел под Кале од новинарите. Четири години не беше прашан како ќе ги реализира своите проекти.“ На тоа водителката на „Топ Тема“ реагираше: „Не, не, апсолутно не е точно дека никого не сме прашале.“
Кој остана со „кратки нозе“, порталите, Андоновски, или водителката на „Топ тема“?
Прво, со „кратки нозе“ останаа порталите кои го објавија тврдењето „Сѐ што вети Арсовска исполнува…“. Прво, нема експлицитно тврдење од Андоновски дека „сѐ што вети Арсовска исполнува“. Освен тоа, кога има универзално афирмативно тврдење, доволно е да се посочи само еден пример за тоа да се побие. На пример, анализата на Вистиномер од 16 декември 2021, Арсовска најави, но не почна на 10 декември да го украсува Скопје за Нова година, го побива тврдењето „Сѐ што вети Арсовска исполнува“.
Второ, со кратки нозе остана и советникот Андоновски со тврдењето дека “Четири години Петре Шилегов не беше прашан за тунел под Кале од новинарите“, не е точно ни тврдењето дека Шилегов „четири години не беше прашан како ќе ги реализира своите проекти.“, тврдењето на порталите кои во наслови тврдеа дека „Шилегов никој ништо не го праша 4 години“. На пример, Шилегов беше прашан и за тунелот под Кале токму на ТВ Телма, во „Топ тема“.
И други новинари му поставуваа на Шилегов прашања за „тунелот под Кале“. На пример, ТВ21 објави содржина: „Дали ќе се реализира тунелот под Кале до Чаир? Одговара Шилегов за ТВ21“. Вистиномер изработи детални анализи не само за ова ветување, како „Не се гледа „светлина“ за ветениот тунел под Кале“, туку и за други ветувања на Шилегов, како на пример „Топ 5 нереализирани еко-ветувања на скопскиот градоначалник Шилегов“, и „Крајот од мандатот – каква е судбината на 20-те најважни ветувања на Шилегов“.
Според ова што го видовме, повеќе медиуми а и советникот Андоновски останаа со кратки нозе со тврдењата дека Шилегов не бил прашуван за ветените проекти.
Поранешниот градоначалник ја плати цената за нереализираните ветувања со губење на довербата на граѓаните. Таков однос граѓаните треба да имаат и кон други политичари, а и кон медиумите, не само за неисполнети ветувања, туку и за изречени невистини. Без оглед кој што мисли, голем број од нив имаат долго паметење, и не заслужуваат политичари и медиуми со кратки нозе.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски