Министерот за внатрешни работи, Оливер Спасовски, зборува за тоа која е врската меѓу нелегалната трговија со оружје со организираниот криминал во земјата и регионот. Разговорот со Министерот Спасовски е дел од активностите на проектот на ЦИВИЛ „Минатото, сегашноста и иднината на контролата на оружјето во Република Северна Македонија“ со поддршка од Глобалната иницијатива против транснационалниот организиран криминал и Резилиенс фонд.
„Проблемот со неконтролираното ширење на малото и лесното оружје во последниве години се искачи меѓу првите места на меѓународната, регионалната и националната агенда. Од време на време сведоци сме дека пролиферацијата на малото и лесното оружје често пати е катализатор кој ги трансформира локализираните инциденти во глобални настани“ – изјави Спасовски за ЦИВИЛ.
Министерот информира дека за таа цел, глобалните и национални активности се важни, заедно со добро координирана национална и регионална соработка на сите агенции за спроведување на законот во зајакнување на контролата за производство и трговија со оружје, градење на стандарди за развој на ефективни системи за следење, размена на информации и транспарентност, споделување на најдобри пракси како и подигање на јавната свест преку спроведување на програми за промовирање и поддршка за намалување и контрола на оружјето во јавното образование.
„Ние како МВР спроведуваме активности на полето на контрола на мало и лесно оружје и во иднина ќе се продолжи активно со спроведување на сите планирани активности, со цел остварување на поголеми резултати во подигнувањето на јавната свест за опасностите од злоупотреба на огнено оружје, спречување на трговијата со оружје, како и воспоставување ефикасни системи за размена на информации“ – вели Министерот Спасовски.
Сите овие активности се предвидени во Националната стратегија за контрола на мало и лесно оружје и Акциониот план на Република Северна Македонија за периодот 2017-2021 и по извршена евалуација на Стратегијата, веќе е започнат процесот на изготвување нова Стратегија за период 2022-2025 која ќе започне да се спроведува од 2022 година и истата ќе биде целосно усогласена со целите утврдени во Патоказот.
„Националната стратегија претставува општа рамка на активности на Република Северна Македонија насочени кон контрола, превенција и искоренување на пролиферацијата на малото и лесно оружје и неговите компоненти, како и муницијата. Истите претставуваат водич за унапредување на постоечките, како и за развој на нови мерки, механизми и инструменти за контрола, превенција и искоренување на пролиферацијата на малото и лесно оружје“ – посочи Спасовски.
Сузбивањето на криминалот од областа на недозволената трговија на оружје и муниција, вклучувајќи ја и употребата на оружјето во кривични дела од областа на организираниот криминал, насилниот криминал, недозволената трговија со дрога и останатите области, претставуваат значаен сегмент во справувањето со ризиците и заканите по внатрешната безбедност на секоја држава.
Градењето и воспоставувањето на систем преку утврдување на процедури и механизми за контрола на легалните и нелегалните текови на оружјето, имаат значајно влијание врз безбедноста. Токму поради овие факти, Патоказот ја донесува онаа додадена вредност за сите наши земји со оглед на фактот што со неговото спроведување ќе се постигне промена во истражувачкиот начин на размислување, ќе се воспостават механизми за фокусирање на оружјето и проактивно собирање, ширење и споделување на сите достапни информации преку еден интегриран систем за управување со информациите.
„Постои сериозна врска меѓу организираниот криминал и оружјето и тероризмот. На крајот на краиштата, секој организиран криминал завршува со тероризам. Така што, колку подобри механизми воспоставуваат државите, и во доменот на следење на малото и лесно оружје и на размена на податоците, толку повеќе ќе може да гарантира безбедност на граѓаните на државата“ – заклучи Министерот Спасовски.
Камера и фотографија: Дехран Муратов
Монтажа: Ариан Мехмети