Според писменоста на своите граѓан(к)и, на листата од 70 земји во светот кои се опфатени со анализата на ПИСА – тестот за образование, Македонија е на 68 место. Тоа значи дека две третини од младите во земјава, на возраст од 15 години, имаат потешкотии со читање и разбирање и проблем со математички операции и природни науки.
Како што се наведува во последниот, пролетен извештај на Светска банка, овие млади луѓе, кога ќе се најдат на пазарот на труд, ќе можат да се вработат, пред сè, во јавниот сектор, бидејќи најмногу од субвенционираните вработувања од Владата се тука.
Друг поразителен податок за Македонија, објавен во извештајот, е дека Светската банка прогнозира дека од земјите во Западен Балкан, Македонија во 2017 година, според растот на БДП, ќе биде на последно место, со раст од 2,8 проценти!
Од Светската банка, која досега Македонија ја оценуваше како успешна приказна, оваа година велат дека не се запрени на време трошењата кои биле добри за време на економската криза.
„Дојдовме до точка кога имаме совет до властите во Македонија дека на среден рок мораат да почнат да преминуваат кон модел со поголем нагласок на инвестициите, а помал нагласок на тековните трошења и моделот на раст да се промени и повеќе да се потпира на инвестиции водени од приватниот сектор и растот да оди нагоре“, вели Екатерина Вострокнутова од Светска Банка, коавтор на извештајот.
„Дефицитот се намали главно како резултат на намалувањето на капиталните инвестиции, а со тоа, уделот на истите во вкупното трошење на Владата се намали и сега е под 10 отсто од вкупните тошења. За сметка на тоа, се згоемија тековните трошењата посебно трошењата за пензиите кои достигнаа скоро 30 отсто од вкупните трошења на Владата“, истакна Бојан Шимбов од Светска банка.
Според извештајот, за одржувањето на растот во земјите од Западен Балкан и за справувањето со тековните предизвици поврзани со невработеноста, земјите треба да продолжат по патот на реформите.
„Извештајот на Светска Банка потврдува зошто за економијата и за граѓаните е итно потребно да се овозможи избор на новата реформска Влада. И Светска банка како и другите меѓународни финансиски институции, псочува дека итно е потребна фискална консолидација и нормалзирање на нивото на јавен долг“, се вели во реакцијата на СДСМ, по извештајот на Светската банка.
