Првата фаза од долгоочекуваниот договор за прекин на огнот во Газа започна по речиси тричасовно одложување, при што Хамас требаше да ослободи тројца израелски заложници подоцна денеска.
Прекинот на огнот требаше да започне во 08:30 часот (06:30 по Гринич), но од Израел рекоа дека Хамас не ги доставил имињата на првите заложници што биле ослободени во замена за палестинските затвореници. Од Хамас одговорија дека тоа било поради „технички причини“.
Хамас сепак ги објави имињата на тројцата израелски заложници кои треба да бидат ослободени денеска, се вели во изјавата на портпаролот на вооруженото крило на Хамас, Абу Обаида, пренесе ЦивилМедиа.
Во одвоено соопштение, Хамас соопшти дека им ги предал имињата на трите израелски заложнички кои треба да бидат ослободени во недела.
Прекинот на огнот на крајот стапи на сила во 11:15 часот, откако Израел ги доби имињата на заложниците. Посредникот Катар рече дека меѓу нив имало британско-израелски и романско-израелски државјани со двојни државјанства, пренесе Би-Би-Си.
Деветнаесет Палестинци, наводно, биле убиени додека израелската војска ги нападнала „терористичките цели“ во Газа по истекот на првичниот рок.
Израелските сили, исто така, ќе се повлечат од густо населените области на Газа, на раселените Палестинци ќе им биде дозволено да почнат да се враќаат во своите домови, а стотици камиони со хуманитарна помош ќе се пропуштаат на територијата секој ден.
Преговорите за втората фаза – во која треба да бидат ослободени преостанатите заложници, целосно повлекување на израелските трупи и „враќање на одржлив мир“ – ќе започнат на 16-ти ден.
Третата и последна фаза ќе вклучува реконструкција на Газа – нешто што може да потрае со години – и враќање на сите преостанати тела на заложниците.
Д. Т.
