Столтенберг изрази сочувство до сите оние кои се погодени од COVID-19 и ги објасни чекорите кои ги презема НАТО за спречување на ширењето на вирусот, намалување на ризиците за војниците и цивилите и осигурување на континуитетот на суштинските активности на Алијансата. Тој нотираше дека способноста на НАТО да спроведува операции не е загрозена. „Нашите сили остануваат подготвени и нашата работа продолжува, вклучително на нашите мултинационални воени единици на истокот на Алијансата, мониторингот на воздушниот простор на НАТО, нашите поморски флоти и нашите мисии од Авганистан до Косово“, изјави тој.
Генералниот секретар истакна дека НАТО со години наназад работи на зацврснување на отпорноста на сојузниците, вклучително во здравствениот сектор. „Ќе продолжиме да се консултираме, да ја следиме ситуацијата и да ги преземаме сите неопходни мерки“, рече тој. Столтенберг подвлече дека НАТО останува посветен на својата мисија за осигурување на мирот и безбедноста на скоро една милијарда граѓани.
Исто така беа презентирани резултатите од најопсежната анкета за НАТО која досега била спроведена. Резултатите, објавени во извештајот, покажуваат дека 81% од луѓето ширум Алијансата веруваат дека соработка помеѓу Северна Америка и Европа во полето на безбедноста е важна. Тие исто така покажуваат дека граѓаните од земјите-членки на Алијансата решително се согласуваат со основниот принцип на колективна одбрана. „Иако, природно, резултатите варираат од земја до земја, генералната поддршка за НАТО е силна“, додаде тој.
„На состанокот на лидерите на НАТО во декември минатата година, инициравме процес на рефлексија за да ја продлабочиме политичката димензија на НАТО и уште повеќе да ја зацврснеме веќе цврстата алијанса. Исто така го потпишавме протоколот за пристап во НАТО на Северна Македонија. Сега кога парламентите во сите земји-членки на НАТО ја завршија оваа ратификација, очекуваме многу наскоро да ѝ посакаме добредојде на Северна Македонија како триесетти сојузник на НАТО“, изјави Столтенберг за приклучувањето на нашата земја во НАТО.
