Државниот инспектор за локална самоуправа Рахим Муслиу на денешната прес-конференција изјави дека Државниот инспекторат донел одлука да ги запре донесените одлуки за распишување на референдуми во општините доодлуката на Уставниот суд.
„Државниот инспекторат одлучи донесените одлуки за распишување на референдуми на локално ниво да ги запре со решение и воедно, да поведе постапка пред Уставен суд за оценување на уставноста и законитоста на донесените одлуки“, рече Муслиу.
Тој истакна дека за донесените решенија на Државниот инспекторат, ќе бидат информирани Министерството за локална самоуправа (МЛС), државниот секретар на МЛС и градоначалниците и претседателите на советите на општините кои ги засегаат овие решенија, а преку градоначалниците ќе се бара да бидат информирани и општинските изборни комсии – за прекин на понатамошните активности.
Истите решенија ќе се објават во „Службен весник“ и во рок од три дена ќе бидат објавувани и на веб-страницата на Министерството за локална самоуправа.
Решенијата се донесени врз основа на член 22 од Законот за локална самоуправа, кадешто се црпат надлежностите на општините. Ова прашање за бегалците, не може да се регулира на локално ниво, бидејќи според член 22 никаде не се спомнува дека тие активности се во надлежност на општината.
Ова се однесува за сите 12 општини кои досега ги објавиле одлуките во „Службен гласник“, како и за општините Карпош и Ѓорче Петров, за кои се очекува да достават одлука во законски предвидениот рок.
Врз основа на одлуките на советите на општините кои биле доставени до Министерството за локална самоуправа (14 општини), Државниот инспекторат за локална самоуправа, врз основа на своите законски надлежности, извршил шест вонредни инспекциски надзори: на 20 септември во општините Кочани и Штип и на 21 септември, во општините Гевгелија, Кавадарци, Неготино и Велес.
ЦИВИЛ во повеќе наврати предупреди на правните и политички контроверзи на овие референдуми. „Референдумите се противзаконски, но тоа што уште повеќе загрижува е нивната крајно валкана политичка димензија. Организаторите се во очигледна спрега со најдеструктивните елементи на македонската политичка сцена и имаат директна и недвосмислена агенда, преку ксенофобијата и исламофобијата, да внесат тензии во односите меѓу верските и етничките заедници во земјава, како што тоа беше случај со сите претходни изборни процеси во нивна режија. Едноставно, исламофобијата и омразата воопшто се валкан политички трик на опозицијата, која постојано промовира екстремизам и насилство, за да внесе страв кој потоа вешто го злоупотребува. Премиерот, владата и релевантните институции не смеат да калкулираат со оваа валкана кампања и да молчат. Политички поен кој нема да го изгубат сега, ќе биде загуба за целата земја во скора иднина“, изјави Џабир Дерала, ЦИВИЛ – Центар за слобода.
Текст, камера и монтажа: Маја Ивановска