На 23 ноември, Инфомакс објави напис со наслов – „30.000 петарди и еден тон нафта се швepцувале во автобусот на „Беса Транс“ кој однесе 45 животи?“. Постот на Фејсбук страницата на Инфомакс, кој содржи линк до написот, Вистиномер го оцени како невистинит, а компанијата Фејсбук ја означи објавата на Инфомакс како „лажна информација“, проверена од независни проверувачи на факти.
Во рецензијата на Вистиномер со наслов„Не е точно дека во автобусот на „Беса-транс“ се шверцувале еден тон нафта и 30 илјади петарди“, се вели: „Во написот којшто е споделен во постот, се изнесуваат непроверени и неофицијални информации, а медиумот се повикува на „информации од истрагата“.
Ваквите шпекулации допреа дури и до странскиот печат, па така „Дејли мејл“ ги пренесе наводите на „Инфомакс“, дека пожарот започнал на предниот дел на автобусот откако експлодирале 30.000 петарди складирани во багажот. Следниот ден, пак, „Дејли мејл“, повикувајќи се на службени извори, се коригираше, истакнувајќи дека истражителите не веруваат во такво сценарио и дека таквите информации се најверојатно невистинити.“, известува Вистиномер.
Освен овој случај, објава со сензационалистички наслов „Трагедии – Автобусот на смртта во Бугарија шверцувал керозин и 30.000 петарди“, која ги пренесува дезинформациите на Инфомакс осамна и на популарниот сараевски портал Радиосарајево.ба.
Сепак, за разлика од овие написи, проверката на „Вистиномер“ не се потпира шпекулации, туку на изјави на бугарски и македонски официјални лица кои потврдуваат дека наводите на Инфомакс не се точни. Но, Инфомакс, за разлика од британскиот Дејли мејл, не ги коригираше изнесените невистини.
При ваквите несреќи најдобро се гледаат разликите кај медиумите. Професионалците признаваат грешка и се коригираат, а непризнавањето грешки и ширењето дезинформации е одлика на непрофесионалците, кои со тоа покажуваат непочитување и потценување на нивната публика. Овие разлики секогаш испливуваат на површина при вакви несреќи, и се поука дека само вистината е состојка што на долг рок ја гради довербата и почитта меѓу медиумите и публиката.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски
