пишува: ЏАБИР ДЕРАЛА
Да расчистиме неколку прашања околу странското финансирање проекти во нашата земја… Значи, постои сериозна разлика. Поддршката што нашата земја ја добива од ЕУ, САД и другите развиени демократии е во буџетските ставки за подобрување на животот, за јакнење на демократските институции, за владеење на правото, за интеграција на општеството, екологија, култура… Поддршката што доаѓа од Москва, никогаш не била, не е и нема да биде насочена кон тие области. Причината е едноставна – Во Русија нема демократија. Таму 20 години владее еден деспот, заедно со најбогатите, олигарсите на кои буквално никој ништо не им може. Таму се гине за слободно изречен или напишан збор. Таму се гладува. Таму владее страв и структурно насилство. Затоа.
Сите тие силни проруски тролови и тапоглавци, па нека се и со највисоки академски титули, никогаш не помислиле да емигрираат или да ги пратат своите деца да живеат во Русија. Сите се со очите кон Запад или веќе се таму со генерации. Зошто? Тоа никогаш не ми стана јасно. Има ли потреба да се разговара понатаму? Зошто младите Русинки и Руси сакаат да избегаат во земјите на Западот? Зошто Американците не аплицираат за руско државјанство?
Ајде да се вратиме на темата за финансирањето.
Има разлика меѓу јавното и тајното финансирање. Финансирањето што доаѓа од фондовите на западните земји завршува во македонските институции, правосудството, изборната администрација, Собранието, локалните самоуправи, армијата, полицијата, болниците, градинките, училиштата, универзитетите… Да не ја занемариме ни економската помош што не доаѓа само во форма на супер поволни кредити (не се однесува на комерцијалните кредити), туку и како милионски грантови за развојни и инфраструктурни проекти. Сета таа помош е јавна и подлежи на строги правила и процедури. И ја добивале сите владини гарнитури, од југословенско доба до денес. Како се употребени, тоа е друго прашање, секако важно, но не е релевантно за прашањата во контекст на денешното писание.
Во споредба со стотиците милиони долари што ги добива македонската држава, преку програмите за развој на институциите, општините и економијата во целост, средствата наменети за развој на медиумите и граѓанското општество се, реално, микроскопски. Може да дебатираме до бескрај, но невладиниот сектор е извонреден ресурс за општеството, државата и заедниците. Со сите опортунисти, фолиранти и други карактери што ги знаеме и што не ги знаеме. Дури и во економска смисла на зборот, НВО секторот е непризнаен, но сериозен работодавач кој овозможува влез на странска валута со која се плаќа домашна работна сила. И плаќа даноци и други давачки. Едуцира, информира, врши мониторинг, нуди експертиза и препораки… И тоа, не само што беспари ги нуди овие и многу други услуги на општеството, туку носи пари, реални пари од странство, не од дома, кои не мора да ги вратат македонските граѓанки и граѓани, како што е тоа случај со кредитите. Најважно од сѐ, не се наменети за поделби, мразење на комшијата, вооружување, насилство, шпионирање и предавство на државните интереси, туку за сѐ што е обратно на тоа: заедништво, мир, ненасилство…
Проблемот настанува кога ќе се обидеме да погледнеме зад тешките завеси на помошта од Москва. Што и кого финансира Кремљ? Тие финансираат, се разбира не јавно и отворено, медиумски проекти што промовираат омраза по сите основи што можете да ги замислите. Кремљ финансира ултранационализам и насилство. Лажните вести, дезинформациите и говорот на омразата се нивните главни инструменти во ширењето на црната пропаганда.
Финансираат невладини организации и политички партии што ги разјадуваат заедниците од внатре, ги зомбифицираат младите и ги ставаат под контрола на тајни центри на моќта. Врбуваат професори, верски лидери, уметници, криминалци, новинари… Не е важен профилот, важна е мисијата… Не се важни моралните и човечките принципи, важно е да се биде дел од организам што се храни од сопствената болест. Нивна храна се омразата и стравот, стравот и омразата… Некои од жртвите на пропагандата не се ни свесни или не сакаат да бидат свесни дека, всушност, работат директно против македонските стратешки интереси, против државата…
Има разлика, нели?
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.