Кога веќе се расправа околу Законот за студентски стандард, треба да се зборува за подобрување на законот, во делот на состојбата во студентските домови, на подобрување на животниот стандард, на задолжителната пракса и на нејзиното спроведување во пракса – е став на Студентскиот пленум, во врска со предлозите за изменување и дополнување на Законот за студентскиот стандард, кои се на дневен ред на денешната собраниска седница. Конкретно, пратениците денес ќе расправаат за воведување на категоријата студент-тутор.
ЦИВИЛ Медиа разговараше со Ивана Туфегџиќ за очекувањата на Студентскиот пленум од измените за Законот што треба да ги изгласа Собранието, а кои се однесуваат на подобрување на студентскиот стандард.
Ивана Туфегџиќ
„Воведување на категорија студент-тутор, е нешто што постои во европските земји и Македонија како и досега, сака да препишува закони од странство, без притоа да има начини како да ги спроведе. Студент-тутор како идеја е во ред, но реализацијата е тоа што претставува проблем, и најверојатно, во тој дел, повторно ќе потфрлиме“, смета Туфегџиќ, која е убедена дека е потребна посеопфатна и посериозна анализа за тоа колку ќе биде подготвена универзитетската јавност за спроведување на овие реформи, и за воведување на категоријата студент- тутор.
„Примерите покажуваат дека често се менуваат закони, а реализацијата, особено во високото образование, е многу слаба. Дополнително, често имаме и законски измени кои се без никаков основ, кои се брозоплети, не се доволно анализирани, донесени се без консултација со стручната и експертска јавност и без консултација со студентите. Тоа придонесува за нивното тешко спроведување во пракса, но и за севкупно, лоши законски решенија“, вели Туфегџиќ.
Идејата за студент-тутор Министерството за образование ја претстави во мај оваа година, кога беше промовиран проектот „Интерактивен портал за тутори“, што треба да започне да се реализира во септември. Како што наведуваат од Министерството, студенти – волонтери, на доброволна основа ќе се пријавуваат и ќе обезбедуваат бесплатни, дополнителни часови по соодветни предмети за учениците од основното образование (од шесто до деветто одделение) и од средното образование.
М. Теговска
