ДМИТРО КУЛЕБА
Со децении, светските лидери ги наведнуваа главите пред воените споменици во Европа и свечено кажуваа: „Никогаш повеќе“. Време е да докажеме дека тоа не беа празни зборови. Русија почна војна на омраза и агресија во Европа. Историјата подоцна ќе процени како секој од нас се спротивставил на злото во ова време. Убеден сум дека ќе го положиме овој испит, но која ќе биде цената?
Несомнено, во претходните децении, споредбите со Хитлер и нацизмот беа премногу често правени и донекаде ја изгубија својата вредност. Но, сега Претседателот на Руската Федерација продолжува да ги бомбардира нашите градови и нашиот народ, да убива цивили. Оваа инвазија несомнено ги повторува акциите на Хитлер и Сталин. Кијив и другите украински градови последен пат доживеале ваква брутална воена агресија рано наутро на 22 јуни 1941 година, кога Хитлер започнал инвазија на Советскиот Сојуз, операцијата „Барбароса“.
Во неговите говори пред и за време на инвазијата, Путин не ја воздржа својата омраза кон Украинците и нашето право да постоиме во нашата сопствена суверена држава. Руските граѓани и војници со години ги трујат со токсична пропаганда која ги клевети Украинците како „неонацисти“ и стравуваме дека се уште не се знае целосниот обем на ужасите што тие се способни да ги направат.
Два дена по почетокот на инвазијата, во еден од руските државни медиуми се појави статија во која предвремено се прогласи заземањето на Украина од страна на Русија и „специјалната операција“ во Украина отворено се нарече „решение на украинското прашање“. Статијата подоцна беше отстранета, но во архивите на Интернетот сè е зачувано.
Зборовите „решение на украинското прашање“ треба да ги исплашат сите. Ако ова не е повторување на историјата, тогаш што е?
Се разбира, секое зло настанало под свои посебни околности. Но, сега едноставно е невозможно да не се види варварскиот обид за прекројување на границите со употреба на брутална сила, уништување на националниот идентитет, лишување на правото на народот на самоопределување и сето тоа заради целосна неподготвеност за компромис.
Појавата на Хитлер и неговата последователна агресија станаа возможни поради неможноста да се спротивстави на ова зло од самиот почеток. Подоцна, крокодилот ги проголта мировниците еден по еден. Мораше да се плати ужасна цена за запирање на неговите глобални амбиции. Не можеме да ги повториме грешките направени пред осум децении.
„Никогаш повеќе“ значи да се дејствува пред да биде предоцна. „Никогаш повеќе“ значи запирање на агресорот додека не предизвика уште повеќе смрт и уништување. „Никогаш повеќе“ значи дека стравот не треба да ги парализира нашите постапки.
Народот на Украина и нашите Вооружени Сили се посветени на овие принципи. Тоа го докажуваат со сопственото херојство и издржливост, невидени од времето на минатата светска војна. Украина ќе победи. Светлината ќе ја победи темнината, изјави Претседателот на Украина Володимир Зеленски. Украина веќе го скрши блицкригот на Путин, им нанесе катастрофални загуби на напаѓачите и ја спречи Русија да ги оствари стратешките цели на инвазијата. Ние издржуваме.
Но, потребна ни е поголема поддршка. Потребни се построги санкции против Русија за да и се одземат ресурсите за понатамошна инвазија; Украина мора да добие континуиран проток на неопходното оружје; ни треба поголема финансиска поддршка за да им помогнеме на нашите цивили и да ја обновиме нашата земја.
Ние навистина ја гледаме и чувствуваме солидарноста на светот. Благодарни сме за неа. Гледаме дека светот му се восхитува на нашиот народ, на нашата армија, на нашиот Претседател и тоа не исполнува со гордост. Но, за да се запре Путин потребни се решителни и итни чекори. Ни требаат борбени авиони. Ни треба ефикасна противвоздушна и противракетна одбрана. Ни треба заштита на нашето небо за да го запреме убивањето на цивили од руски авиони и ракети.
На фронтот на санкциите, бараме исклучување на рускиот „Сбербанк“ од системот SWIFT, бараме земјите да престанат да купуваат руска нафта, која сега е извалкана со украинска крв, бараме да им се забрани на руските бродови да влегуваат во светските пристаништа, бараме замрзнување на тврда валута на руските финансиски институции во САД, Швајцарија, Јапонија, Велика Британија и ЕУ.
Русија и Путин мора да бидат целосно изолирани од светот. Руските амбасадори и претставници треба да бидат протерани од меѓународните организации. Бојкотите и забраните за културни и спортски настани треба дополнително да се прошируваат.
Некои чекори се веќе преземени. Како министер за надворешни работи на Украина, јас сум длабоко трогнат од милионите луѓе кои излегоа на улиците на нивните главни градови да протестираат против руската инвазија и да извршат притисок врз нивните влади, приморувајќи ги да преземат итни дејствија.
Истовремено, за да ја запреме Русија, можеме и мораме да направиме многу повеќе. Нема време за чекање или сомневање. Време е да се направи колективен тест за човечност. Зборовите „Никогаш повеќе“ треба да бидат поттик за мобилизација и повик за дејствување, а не свечено, но празно ветување. Време е да се докаже дека 21-от век се разликува од 20-от.
Авторска статија на украинскиот министер Дмитро Кулеба за Вашингтон пост
