Полицијата поведе истрага за инцидентот во којшто е тешко повреден, командирот на битолската Шумска полиција, Лазар Јошевски, денеска околу 10.30 часот, во атарот на селото Изибиште. Настанот се случил при редовна контрола на шумските полицајци на терен. При обид да контролираат трактор со приколка натоварен во дрва, еден од двајцата дрвокрадци ја откачил приколката од тракторот, а таа поминала преку нозете на командирот.
„Командирот на Шумската полиција го стигнал тракторот, успеал да се качи на него и на возачот му наредил да застане. Возачот се оглушил, извадил нож и замавнал кон командирот. Тој скокнал од тракторот и паднал на земја, возачот на тракторот ја отпуштил приколката и го напуштил местото на настанот. Приколката поминала врз долните екстремитети на командирот, при што тој се здобил со скршеница на ногата“, соопштуваат од СВР Битола.
Јошевски е итно пренесен во битолската болница, хоспитализиран во Ортопедското одделение и задржан на на лекување.
Од Министерството за земјоделство, шумарство и водостопанство за ЦИВИЛ Медиа, најавија дека во иднина ќе се преземат сите потребни мерки за да се спречат вакви инциденти.
„Ако е потребно ќе се интервенира и во законот, за да им се овозможи на шумските полицајци сами да може да поднесат кривична пријава во ОЈО, за случаи во кои тие како овластени лица се спречени да ја извршуваат службената должност. Но, и за да не бидат во иднина жртви на вакви инциденти, коишто беа чести изминативе години“, истакнуваат од Министерството.
Условите во кои што работат припадниците на Шумска полиција во Македонија се на исклучително ниско ниво, според сознанијата што Полицискиот синдикат ги сподели со ЦИВИЛ во изминатиот период.
ЦИВИЛ го осудува насилството, како и кражбата на националното богатство на земјата.
Моника Талеска
