Купување гласови има и ќе има. Во прилично високи дози. Тешко е да се открие, уште потешко да се докаже. Освен тоа, нема вистинска законска закана за тие што го купуваат достоинството и честа на сиромашните за ситни пари што им припаѓаат токму на тие што го примаат поткупот. Да! Тие пари не се на изборните криминалци, туку се наши пари, на граѓанките и граѓаните.
Не ви чини законот, другарчиња! Многу е провидна намерата на законодавецот, нејзиниот предлагач и оние што гласале за него во собранието. Ако воопшто го прочитале, пред да гласаат и да си подигнат супер платичка од нашите пари. За што зборувам?
Во член 162 од Кривичниот законик стои: „Тој што на лице со избирачко право му нуди, дава или ветува подарок или друга корист, со намера да го придобие да го врши, да не го врши или како да го врши избирачкото право, ќе се казни со затвор од најмалку пет години. Со казната од став 1 ќе се казни и лице со избирачко право кое ќе бара за себе подарок или друга корист или ќе прими подарок или друга корист, за да го врши, да не го врши или како да го врши избирачкото право.“
Дотука е ОК. Но, тој член не завршува тука. Истиот член од законот, во продолжение, всушност, го охрабрува купувањето гласови. Па вели: „Ако користа е од помала вредност, сторителот ќе се казни со парична казна или со затвор до една година. Ако делото од овој член го стори правно лице, ќе се казни со парична казна.“
Значи, ако ја намалат цената на достоинството на луѓето, ако ги осиромашат до крајни граници и ги стават под својата валкана чизма, ако ги обесхрабрат и претворат во неинформирани и рамнодушни битија – казната е помала, поточно, симболична. Дотолку повеќе, ако правно лице, значи компанија, партија, институција или невладина организација го стори делото – казната е само парична. Види, мајката!
Логиката не треба, туку МОРА да си ја смените, правничиња и политичарчиња!
Луѓето на кои им значат тие 500 денари (а често и само кутија со по некој евтин детерџент и некое брашно со истечен рок, па го ставаат својот глас, своето достоинство во канџите на политичките никаквеци), се жртви на системот и на политичките партии. Газењето по нив се казнува со парична казна! Па како бе, арамии!? Чија совест и достоинство чинат 500 денари, на тие што ги осиромашивте и заплашивте или вашата, што крадете од сиромашните и си делите меѓу вас, богатите, па тоа го браните и со смешна законска одредба?! Не ме интересира вашата „правничка“ логика. Ја гледам логиката на тие што бараат правда. Сменете го законот!