Денеска претседателот на Државната изборна комисија, Александар Чичаковски, апелираше до политичките партии итно да престанат со инциденти со порака дека насилството во овој период може да им наштети на кандидатите, на партиите, на изборниот процес и на државата.
Прашањето што се поставува е колку ќе им наштети на граѓанките и граѓаните, односно на гласачко тело? Нели овие избори се сепак, пред сѐ и над сѐ во нивен интерес.
Чичаковски нагласи дека инцидентите го нарушуваат и демократскиот амбиент на изборниот процес. Кодексот за фер и демократски избори, како што нагласи Чичаковски, ги обврзува сите потписници, учесници во изборната трка целосно да го почитуваат.
Исто така, тој ги повика надлежните институции да ги расветлат инцидентите и да ги казнат сторителите, а политичките партии да придонесат кон смирување на страстите.
ЦИВИЛ – Центар за слобода вчера се огласи со соопштение во кое повика да се сопре насилството за време на избори, вклучително напад врз лица што се длабоко инволвирани во изборната кампања.
ЦИВИЛ, исто така, во неколку наврати, ја оцени соработката со Државната изборна комисија за задоволителна во однос на претходните изборни циклуси и покрај забелешките што се однесуваа на Избирачкиот список, како и потребните промени во Изборниот законик, за кои немаше време да се одлучува.
ЦИВИЛ беше единствената организација што вчера се огласи со соопштение во кое повика на нулта толеранција кон насилството.
„Насилството за време на избори, без оглед на мотивите, го поткопува демократскиот карактер на изборниот процес и ги доведува во прашање фундаментите на општеството и државата. Никогаш ништо добро не може да произлезе од насилството, освен трагична загуба на животи, став и хаос“, стои во соопштението.
Сепак, добро е што ДИК реагираше не игнорирајќи го фактот дека колку и да е приватно, во тек на кампања сѐ е изборно.
Б.Ј.
