„Државната изборна комисија со консензус донесе одлука за заклучување на Избирачкиот список и сметам дека истиот, претставува добра основа за спроведување на кредибилни и фер избори“, тврди претседателот на ДИК, Александар Чичаковски, во интервју за Радио Слободна Европа.
„Добар индикатор за ова е тоа што огромен број на граѓани за време на јавниот увид извршија проверка на нивните податоци, преку веб-апликацијата која им беше достапна, како и преку подрачните одделенија и канцеларии на ДИК, и од нивна страна беа доставени многу малку број на барања за запишување, промена или бришење на податоците во Избирачкиот список. Исто така, беше извршена контрола на состојбата во Избирачкиот список од страна на избирачките партии. Индикативно е што добивме само триесеттина барања за запишување, промени или бришење во податоците на Избирачкиот список. Самото тоа покажува дека сите актери вклучени во изборниот процес, сметаат дека истиот претставува добра основа за спроведување фер и кредибилни избори“, образложува Чичаковски.
Претседателот на ДИК во интервјуто истакнува дека „степенот на точност на податоците во Избирачкиот список, зависи од степенот на точност на податоците кои доаѓаат од релевантните институции“, што значи дека за евентуалните аномалии, одговорноста за Избирачкиот список се префрла на други институции.
Чичаковски е задоволен од процесот на проверка на Избирачкиот список. „Најголеми забелешки, кои ги имаа одредени политички партии и граѓаните во однос на Избирачкиот список кој беше подготвуван за спроведување на предвремените парламентарни избори, се однесуваа во однос на точноста на податоците кои ги добивавме од релевантните институции. Во овој период, ДИК е во интензивна соработка со сите релевантни институции. Во рамки на некои од нив беа спроведени управни постапки за да се адресираат дел од забелешките кои беа нотирани и од страна на Државната изборна комисија во извештајот кој го дадовме врз основа на спроведените вкрстени проверки, теренски и административни“, вели Чичаковски во интервјуто за Радио Слободна Европа.
ЦИВИЛ – Центар за слобода доби голем број повици од граѓанки и граѓани во изминатиот период, во кои тие се жалеа на непостоечки лица на нивните адреси. Уште позагрижувачки е тоа што голем број граѓанки и граѓани не можеле да се најдат на Избирачкиот список, а нивниот број е повисок од „само триесетина“, според евиденцијата на ЦИВИЛ.