ВЕСТ НА ДЕНОТ
Продолжи расправата за францускиот предлог, опозицијата со вувузели на собраниската седница, мал број граѓани протестираат пред Собранието
Во Собранието денеска продолжува 81 седницата, единствена точка на дневниот ред е владината Информација за содржината на Предлог-преговарачката рамка за пристапните преговори на Северна Македонија со Европската Унија, предложена од француското претседателство. Расправата продолжи во слична атмосфера како што се одвиваше и вчера, со користење на вувузели и свирежи од пратениците на ВМРО ДПМНЕ за време на обраќањето на пратениците на СДСМ.
ИЗЈАВА НА ДЕНОТ
ВОЈНА ВО УКРАИНА
Амбасадорката на САД во Украина Бриџит Бринк, на Твитер повика да и се помогне на Украина да се одбрани од злосторствата на Русите, пренесува Укринформ.
„Мојата прошетка низ Бабин Јар беше отрезнувачки потсетник на нацистичките ужаси извршени врз Евреите и другите, кои руските проектили ги направија премногу реални, повторно погодувајќи во близина и убивајќи невини“, напиша таа на Твитер.
*
Полицијата идентификуваше 19 од 23 лица убиени од руски ракетни напади врз Виница, објавi на Фејсбук
nачалникот на Националната полиција на Украина, Ихор Клименко, пренесува Укринформ.
„Полицијата идентификуваше 19 од 23 лица убиени од ракетни напади на Виница. Меѓу жртвите на рускиот напад има три деца: едно 4-годишно девојче и две момчиња, 7 и 8 години“, рече Клименко.
*
Русија цинично ги гранатира украинските градови и треба да биде призната како терористичка држава на меѓународно ниво, изјави украинскиот премиер Денис Шмихал во објава на Телеграма, пренесува Укринформ.
„Цинично и брутално гранатирање на украинските градови: Миколаев, Часив Јар, Виница. Убиени се десетици цивили. Русија ја продолжува својата политика на заплашување и тероризам. Затоа треба да биде признаена како терористичка држава на меѓународно ниво“, напиша Шмихал.
*
Првата дама вели дека детето-жртва на рускиот ракетен напад на Виниција глуми во нејзиното божиќно видео, пренесува Укринформ.
Девојчето од Виница Лиза (4), која беше една од убиените во рускиот ракетен напад на Виница на 14 јули, глуми во божиќното видео на првата дама Олена Зеленска од 2021 година, објави на Твитер сопругата на украинскиот претседател, првата дама Олена Зеленска.
*
Денес го упатувам ова обраќање не до Украинците и Украинките, како обично, туку до нашите партнери. На демократскиот свет, истакна украинскиот претседател Володимир Зеленски во синоќешното видео обраќање.
Овој ден повторно докажа дека Русија треба официјално да биде призната како терористичка држава. Ниту една друга земја во светот не претставува таква терористичка закана како Русија. Ниту една друга држава во светот не си дозволува секој ден да уништува мирни градови и обичен човечки живот со крстосувачки ракети и млазна артилерија, изјави Зеленски.
ФЛЕШ ВЕСТИ
ОДБРАНА Денеска во министерството за одбрана министерката Славјанка Петровска се сретна со претставници на Лабуристичката партија во британскиот парламент, Алекс Собел и Стивен Даути, со кои разговараше за силната одбранбена соработка помеѓу Северна Македонија и Обединетото Кралство, видлива преку реализирани заеднички обуки и вежби со кои ја градиме интероперабилноста со партнерите и сојузниците на НАТО.
ПРОТЕСТИ Приведено уште едно лице од инцидентот кај плоштадот Скендер бег како и насилник кој на протестот на 5 јули физички нападна полициски службеници
БЕЗБЕДНОСТ МВР со кривична пријава против директорот и уште 5 вработени лица за случајот во Зоолошката градина Скопје. При извршена обиколка на Зоолошката градина, по претходно добиени сознанија, тие биле затекнати во помошните простории на Зоолошката градина (кујна за подготвување храна за животните) како подготвуваат храна од коњи (12 коњи и една мазга) кои ги колат на лице место за месото да го употребат како храна за дивите животни во Зоолошката градина.
ИНТЕГРАЦИИ Одбивањето на францускиот предлог ќе значи ретроградни процеси коишто можат да не оддалечат и повторно да не остават сами. Во таа ситуација членството во НАТО може да помогне, но сигурно нема да ја гарантира безбедноста на начин како што тоа ќе биде со полноправното членство на нашата држава во ЕУ, изјави деканот на Факултетот за безбедност, професор Никола Дујовски, во врска со безбедносните ризици за државата, доколку се прифати или одбие предлог-преговарачката рамка.
ЦИВИЛНИ АКТИВНОСТИ
Во фокусот на ЦИВИЛ: „Национализмот на политичката улица“
На панел дискусијата од серијата Во фокусот на ЦИВИЛ, на тема „Национализмот на политичката улица“. се дискутираше за повеќе аспекти на националистичкиот наратив што стана придружен елемент на актуелните протести против европскиот предлог за пристапни преговори на Северна Македонија за членство во ЕУ.
Учесници на панелот беа Роберт Алаѓозовски, Национален координатор за развој на културата и меѓуресорска соработка, Сретан Димитриевски од Асоцијација- Центар за антитероризам и мир, Гардијан -Куманово, Тони Ангеловски од МВР, Биљана Јордановска и Дијана Тахири од ЦИВИЛ. Настанот го водеше Џабир Дерала, ЦИВИЛ.
МРЕЖА
Иванов: Негаторите на АСНОМ ги кршеа бистите на партизаните, сега АСНОМ од уста не го вадат
Да пукнеш, негаторите на АСНОМ, ги кршеа бистите на партизаните, сега АСНОМ од уста не го вадат – преваранти!!, објави на Фејсбук новинарот Зоран Иванов.
Д.Мишев
