„Овие протести (против европскиот предлог за спорот со Бугарија), онака како што се одвиваат просто ги исполнија сите негативни карактеристики и прераснаа во сè она што не требаше да бидат. Тие протести најпрво се националистички, антидемократски, антислободарски, антиевропски и кои разгоруваат нетрпеливост, и внатре меѓу етничката заедница меѓу македонскиот народ, но и меѓу останатите заедници, видовме од примерите во изминатиов период. Организаторите на протестите се однесуваат како „слон во стакларница“ со цел да исполнат одредени цели тие прават многу поголема штета“, вели Роберт Алаѓозовски, националниот координатор за интеркултурулизам и едно општество во Владата на Република Северна Македонија, на панел дискусијата на ЦИВИЛ на тема „Национализмот на политичката улица“.
„Политиката е работа на стратешко играње. Опозицијата има своја улога, граѓанскиот свет си има своја улога, Собранието, Владата… Загриженоста на граѓаните и на самите членови на владата што ја искажаа, резултираше со подобрен француски предлог. Се организираа протести и тие требаше да го повторат нивото на загриженост, и на тој начин предизвикаа неколку пати да се обратат и Претседателот на државата, и Премиерот и да ни дојде претседателката на Европската Комисија, Урсула Фон дер Лајен, личноста која ги раководи нашите преговори со ЕУ, беше дочекана во една недемократска атмосфера и во овие два дена во Собранието и наоколу сме сведоци на поттикнување на национална нетрпеливост, на дискурс кој е насочен кон дел од претставниците на сопствениот народ и има една недемократска атмосфера.
Опозициските пратеници со вувузели свират и не сакаат да ги слушнат аргументитре на пратениците од власта, туку сакаат да го наметнат својот диктат. Во тој смисол одговорноста е голема, ние имаме континуитет на вакво однесување од 27 април 2017 наваму, со ситуација со референдумот, со сите преговори и процедури за влегување на земјата во НАТО, ние гледаме дека истата опозициска структура се однесува недемократски.
За иднината на оваа држава одлучуваат сите граѓани преку демократскиот систем. Не може преку политичката улица да се наметнат решенија, дури и ние кога протестиравме сите наши решенија беа потвредени и одеа преку демократска процедура“, вели Алаѓозовски.
Д. Муратов
камера: Атанас Петровски
монтажа: Ариан Мехмети
