По серијата текстови на ЦИВИЛ Медиа за градинката „Пчела“ во Чаир во која се вршела злоупотреба на деца со религиозни содржини, објавени на порталите на ЦИВИЛ – Центар за слобода на македонски и на албански јазик, a кои произлегоа од темата на граѓански новинар за нерегистрираната градинка „Пчела“, не стивнуваат реакциите на медиумите кои се заинтересираа за темата, на институциите, но и во пошироката јавност.
Објектот во кој е сместена „градинката“ е во сопственост на организацијата „Мустафа Паша“ која е регистрирана како Фондација за образование, култура и хуманитарна помош. Фондацијата е регистрирана во 2012 година и има 11 сопственици.
Министерството за труд и социјална политика презеде активност за проверка на градинката, дали е регистрирана, кој стои зад неа, кое е службеното дејствие и врз која основа ги крши уставните одредби на секуларна држава како Македонија. Оттаму открија дека во приватна куќа, пренаменета во градинка, се одржува верска настава на деца од 6 до 11 години.
„И децата и наставничките потврдија дека тука се одржува настава со верски обреди (молитви, поклоненија и учење на верски книги) од 11-16 часот секој работен ден. По барање на инспекторот од Државниот инспекторат за труд, за увид во документацијата за работа на објектот, било кажано дека целокупната документација ја поседува сопственикот на хуманитарното здружение ‘Мустафа Паша’, кој е турски државјанин. Исто така, од кажување на присутната наставничка, оваа хуманитарна организација имала повеќе објекти со ист воспитно-образовен карактер, но истата не знаела каде се наоѓаат“, соопшти Министерството.
Од Министерството информираат дека во интерес на безбедноста на децата кои спротивно на законот, се згрижуваат во т.н. хуманитарна организација, ќе побараат од МВР и од Министерството за образование и наука, во рамките на своите ингеренции, да ја испитаат оправданоста, карактерот, целите и намерите на хуманитарната организација.
„Без наша согласност тоа не може да го направи никој и не смее да помисли за такво нешто. Ние нема да дозволиме некој несвесно да ни ги зарази (децата – н.з.). Колку е тоа информирање и едукација, толку може да биде и труење! Јас ви гарантирам и им велам дека со сите тела на ИВЗ едногласно се спротивставуваме“, изјави Сулејман Реџепи, претседател на ИВЗ.
Претставници на Народниот правобранител, исто така, излегоа на терен со цел утврдување на конкретните случувања во и со градинката за деца „Пчела“. Од оваа институција, бараат одговорност за лицата кои го дозволиле работењето на градинката.
Одговорност побараа и двете најголеми политички партии во земјата СДСМ и ВМРО-ДПМНЕ.
Од МВР велат дека вчера го добиле известувањето и тоа е предадено на надлежните организациски единици.
Освен осудите, со делумно поинаков став по прашањето, излезе Детската амбасада „Меѓаши“ во чие соопштение се вели дека „децата кои го посетуваат центарот се деца на родители кои практикуваат ислам. Родителите самоволно и по свое лично убедување ги праќале децата во тој центар и имале сознание дека тука, освен друго, се учат и основните верски одредби. Всушност, тоа било и причината поради која тие ги запишале децата во таа ‘градинка’”.
Истовремено, и од Меѓаши сепак, додаваат дека детските градинки се јавни установи и сите кои работат во градинките мора да се придржуваат на позитивните прописи на Република Македонија со кои се гарантира заштитата на детските права и најдобриот интерес на детето и неговиот развој во духот на прифаќање, споделување, примање, како и други вредности во духот на мултиконфесионализам.
Според Уставот, Македонија е секуларна држава, а верската настава не е дозволенa во предучилишни паралелки и во основните училишта.
Маја Ивановска