„Искрено речено, не посакувам ваква година да ни се случи како институција, од едноставна причина што, под притисок на јавноста, се откри корупцијата којашто била во Антикорупциска со години“, посака Розета Трајан, генералната секретарка на Секретаријатот на Државната комисија за спречување на корупција, во разговор за ЦИВИЛ МЕДИА, како дел од серијалот „Перспективи 2019“.
Трајан истакна дека во 2018 бевме соочени со фактот дека политичките елити немаа волја да ги решат ваквите ситуации, токму поради законските недоречености, што ја доведе ДКСК да се соочува со година во која членовите принудно си дадоа оставки, а самата институција остана нефункционална.
„Година што, иако изнесе многу проблеми на површина, донесе и нова надеж и потреба за носење подобро законско решение и надминување на сите проблеми што низ годините ги имала нашата иституција“, изјави Трајан за ЦИВИЛ МЕДИА, укажувајќи дека цела една година е могу долго време да се донесат нови законски решенија и избор на нови членови.
Сепак, таа се надева дека ДКСК конечно ќе има членови што се независни, професионални, експерти од областа на борбата против корупцијата.
„Ако имаме предвид што е меѓународен стандард, тогаш ќе дојдеме до заклучок дека институциите на светско и глобално ниво се дел на превенција и репресија… Во оваа броба која е особено тешка и комплицирана не само ДКСК и истражните органи, како МВР, обвинителство, судовите, значајна и повеќе од потребна алатка и подршка секако се и граѓанските организации, граѓанските активисти, новинарите и самата јавност“, истакна Трајан, укажувајќи дека е потребен еден сеопфатен пристап во кој целото општество ќе биде инволвирано.
„По дефиниција, борбата со корупцијата значи пред сè отвореност, транспарентност и очетност“, рече Трајан.
Очекувањата за 2019 година, како што истакна Трајан, се конечно донесување на новиот Закон за спречување на корупцијата и судирот на интереси, избор на нови членови на ДКСК што ќе бидат осободени од политичките стеги и што нема да им служат на политичките елити, Секретаријат со зајакнати овластувања и права на вработените.
Текст и монтажа: Биљана Јордановска
Камера: Дехран Муратов
Фотогорафија: Ангела Петровска
Овој разговор е дел од серијалот „Перспективи 2019“ во рамките на проектот „Граѓанки и граѓани за слободно општество“ на ЦИВИЛ, со финансиска поддршка од Министерството за надворешни работи на Сојузна Република Германија.
