По потпишувањето на декретот со кој државјаните од Ирак, Иран, Јемен, Либија, Сомалија, Судан и Сирија не можат да добијат виза за влез во САД во наредните 90 дена, американскиот претседателот Трамп продолжува со контроверзни потези, не покажувајќи загриженост за реакциите
Доналд Трамп почна да се пресметува и со своите неистомисленици. Најпрви, ја отпушти генералната обвинителка и министерка за правда, Сели Јејтс, обвинувајќи ја дека врши предавство кон Министерството за правда. Овие обвинувања против министерката, уследија по нејзиното одбивање на указот на Трамп за заштита на граѓаните на САД. За нов вршител на должноста на овие функции, Трамп привремено го назначи Дејн Боент, кој ги стави вон сила инструкциите на Јејтс.
По отпуштањето на министерката, Трамп го отпушти и вршителот на должноста раководител на Службата за доселување и царина, Даниел Регсдејл.
Во меѓувреме, државниот обвинител на американската држава Вашингтон, Боб Фергусон најави дека ќе го тужи претседателот Трамп поради указот за контрола на миграцијата, со што Фергусон е официјално и првиот државен обвинител кој покренува тужба против Трамп. Фергусон е еден од шеснаесетмина државни обвинители, кои оценија дека одлуката на Трамп е „неамериканска и незаконска“.
Уште една од низата шокантни одлуки на Трамп е најавата дека САД ќе ја смени политиката во однос на климатските промени и ќе се повлече од Договорот за смалување на емисијата на стакленички гасови. Тој уште во својата кампања вети дека ќе ја зголеми експлоатацијата на нафта, гас и јаглен во САД, како и дека ќе ги повлече САД од Парискиот договор за борба против климатските промени.
Претседателот на Европскиот совет, Доналд Туск, во изјавата во Талин, Естонија, ги смести САД на чело со претседателот Доналд Трамп меѓу „надворешните закани на ЕУ“. Според Туск, промената на власта во Вашингтон, особено ја става ЕУ во тешка ситуација, зашто „новата администрација навидум сака да ги доведе во прашање последните 70 години од американската надворешна политика“
