Претседателот Доналд Трамп издаде морничаво, однапред снимено видео, кажувајќи ѝ на толпата свои поддржувачи која се обиде да го преземе американскиот Капитол. „Одете си дома. Ве сакаме, многу сте посебни“ – вели тој, меѓу другото во видеото, но истовремено испраќа лажни пораки дека изборите се украдени.
„Ја знам вашата болка. Знам дека сте повредени. Имавме избори кои ни беа украдени. Беа пресвртнички избори и сите го знаат тоа, особено другата страна. Но, мора да си одите дома сега. Мора да имаме мир. Мора да имаме закон и ред. Мора да ги почитуваме нашите големи луѓе во закон и ред“, објави Трамп на Твитер.
„Не сакаме никој да е повреден. Ова е многу тежок период. Никогаш немало ваков период, каде што може да земат сѐ од нас. Од мене, од вас, од нашата држава. Ова беа избори со измами, но не можеме да играме во рацете на овие луѓе. Мора да имаме мир. Така што, одете си дома. Ве сакаме, многу сте посебни. Видовме што се случува, гледате како остантите се третирани, тие се толку лоши и толку злобни. Знам како се чувствувате. Но, одете си дома, одете си дома во мир.“ – вели Трамп во своето кратко видео.