Трудовата инспекција лично од премиерот Зоран Заев ќе добие налог да провери дали верските заедници ги почитуваат законските обврски од аспект на плаќање даноци и придонеси.
Ова го истакна претседателот на Владата Зоран Заев, откако пратеникот Мухамед Зеќири на собраниска седница праша дали трудовата инспекција некогаш ќе влезе во Исламската верска заедница (ИВЗ) да провери дали им се плаќа инвалдиско и пензиско осигурување на имамите кои се жалат дека тоа не се прави.
– Владата негува добар однос со сите верски заедници. Не сме надлежни, ниту сакаме, а и Уставот не дозволува инволвирање во внатрешните избори и уредувања, но тоа не значи дека некој може да биде надвор од Законот кога се работи за плаќање даноци, придонеси,… истакна премиерот Заев.
Давачките, потенцира, и чесниот пристап, мора да важат за секого, независно за која верска заедница станува збор, а резултатите од контролите ќе бидат јавно соопштени.
И МВР во овој сегмент води одредена истрага врз основа на пријави што дополнително, истакна премиерот, ќе даде одговори. (МИА)
