Координаторот на Трудов Сектор на Левица и член на статутарна комисија на Левица, ЛО Велес, Бобан Кочовски, на 31 октомври, на својот Фејзбук профил, пишува статус со клевета и навреда кон ЦИВИЛ и нејзините членови.
Во продолжение, го објавуваме јавното обраќање од ЦИВИЛ до Кочовски во кое се бара извинување, кое истовремено е испратено и до Кочовски, како порака на неговиот Фејсбук профил од кој е објавена навредливата и клеветничка порака во која се препознава и експлицитен говор на омраза.
Почитуван,
Во врска со наводите изнесени во објавата на Вашиот Facebook профил на ден 31.10.2020 година, со наслов „ЦИВИЛ МЕДИЈА (фашизоиден портал)“, Ве известувам дека:
Со објавување на следните клевети и навреди:
– „ЦИВИЛ МЕДИЈА (фашизоиден портал)“,
– ‟ ….квази новинари кои што би ја продале сопствената мајка, само за да добијат по некоин долар повеќе!”
– ‟…. СЕКТА во Република Македонија која што е привезок на СДС изминативе десетина години”
– ‟…секташи за кои ништо не е свето, кои достоинството го продале на оној кој што понудил повеќе, се гнојот во нашево напатено општество. ”,
– ‟… вршат обуки во кои на младите лица, а неретко и на децата, им ги перат мозоците со нивините идеали … ” како и
– ‟….профитери северџански,
сериозно се нанесува штета на честа и угледот на невладината организација ЦИВИЛ – Центар за слобода и нејзината организациона единица ЦИВИЛ МЕДИА, кои заради својата повеќегодишна професионална работа со објективно и непристрасно информирање, несомнено уживаат поддршка и углед во новинарскиот и медиумскиот сектор.
Исто така, сметаме дека со изнесување на ваквите клевети и навреди, од Ваша страна, особено како член на Централниот Комитет на ЛЕВИЦА, го доведувате во прашање и угледот на Вашата политичка партија и нејзините претставници во Парламентот.
Во интерес на вистината и објективното информирање, имајќи го во предвид угледот и реномето на невладината организација ЦИВИЛ – Центар за слобода и нејзината организациона единица ЦИВИЛ МЕДИА, а со цел да се спречат последиците на, од Ваша страна, објавените клевети и навреди, изнесени во објавата на Вашиот Facebook профил на ден 31.10.2020 година, со наслов „ЦИВИЛ МЕДИЈА (фашизоиден портал)“, бараме веднаш, а најдоцна во рок од 2 (два) дена од денот на приемот на ова барање, да се извините и Вашето извинување, да го објавите на Вашиот Facebook профил, на ист начин и во ист обем како што беше објавaта под наслов „ЦИВИЛ МЕДИЈА (фашизоиден портал)“.
Во спротивно, ќе бидеме принудени заштитата на честа и угледот на Невладината организација ЦИВИЛ – Центар за слобода да ја остваруваме по судски пат.
Остануваме во очекување на објавување на Вашето извинување.