пишува: ДЕХРАН МУРАТОВ
Прв ден во ЦИВИЛ во 2015, непозната територија, непознати луѓе, непознати карактери… Освен што се познавав со дел од активист(к)ите на ЦИВИЛ на едно „здраво“ од улиците на граѓанските протести.
Не знаев како ќе бидам прифатен, бидејќи живееме во стереотипно општество полно со предрасуди и омраза кон „различните“. Но, ставот од неприфаќање поради мојата верска и етничка припадност исчезна при самиот влез во ЦИВИЛ, кој е синоним за мултикултурно општество, односно „Југославија“ во мало, каде има (без присила) братство и единство, и почитување на различностите.
Македонци, Албанци, Бошњаци, Турци, Срби, Роми, Црногорци, Власи… Христијани, муслимани, атеисти… рокери, панкери, турбофолкери… Сè на едно место.
Би се запрашал човек – а како функционира ЦИВИЛ со толку различности во екипата, зар нема несогласувања, поделби, карања?
Нема. ЦИВИЛ функционира беспрекорно!
За тоа како функционира ЦИВИЛ, доволно говори фактот дека речиси на сите банери насловот на проектот е напишан на сите официјални јазици кои се говорат во нашата земја. Тоа не е така поради „Рамковниот договор“, туку затоа што ЦИВИЛ тоа и è, не му треба некаков договор за да се почитуваат правата на сите етнички или верски заедници.
За десетина дена почнува рамазанскиот пост, па се присетив дека откако сум дел од тимот на ЦИВИЛ ниту една година не се пропушти да не се направи ифтар, и тоа организиран од колегите кои се атеисти или христијани. Треба да се биде дел од една таква ифтарска вечер за да се почувствува атмосферата, дружбата, почитувањето на различноста… Со зборови тешко може да се долови таа почит.
Во ЦИВИЛ за Велигден се кршат јајца, за Бајрам се јаде баклава, за Стара Нова година се врти лепче на кого ќе му се падне паричката…
Убавината на ЦИВИЛ е токму во различноста. Доколку во сите невладини или владини институции, компании, здруженија… има ваков „коктел“ од различности како во ЦИВИЛ тоагаш нема да има национализам, предрасуди, омраза, страв од непознатото… туку ќе има разбирање и почитување на различноста!
