Во текот на вчерашниот ден, Мониторинг тимот на ЦИВИЛ забележа и архивира низа објави на социјалните мрежи и медиумите со говор на омраза и повици за насилство. Врз основа на тоа кој ги креираше и пласираше и како беа пласирани и дистрибуирани овие пораки, може да се дојде до заклучокот дека тие беа организирани од највисоките ешалони на одредени политички партии, помогнати од медиумите и онлајн групите кои се под нивна контрола.
Како што е познато, на 11 ноември, во Собранието на РСМ требаше да се гласа за недоверба на актуелната влада, по иницијатива на опозициските партии ВМРО-ДПМНЕ, Беса, Алијанса за Албанците, Алтернатива и Левица.
Откако пратеникот на Беса, Кастриот Реџепи не се појави во собранието, почнаа шпекулациите, повиците за насилство и говорот на омраза од веќе познатите личности кои редовно го користат овој вокабулар.
Во изјава за медиумите доцна синоќа пред Собранието, лидерот на Левица, Димитар Апасиев рече дека потребно е опозицијата да ги радикализира методите.
„Ова е преседан кој ќе ни се врати од глава. Кога можете пратеник да киднапирате и да држите… Не знам дали го видовте видеото, мене ми изгледаше како оние заробеници на терористички организации пред егзекуција. Ситуацијата е опасна, граѓаните треба да ја сфатат сериозноста. Мислам оваа власт не паѓа со милум и треба радикализација на состојбата“, порача Апасиев.
Сопругата на Апасиев, Тамара Јованов, којашто е професорка на Економскиот факултет во Штип, вчера во текот на денот на својот Фејсбук профил објави статус со закана.
„На сите што во устата ви е Левица, воглавно за лошо, едно само имам да ви кажам: уште не знаете со кого си имате работа! Ама ќе дознаете. Ич не ви се секирам“, истакна таа.
Уредниците на „Инфомакс“ и „Лидер“, Александар Митовски и Љупчо Златев, го повикуваа „народот да излезе на улица“ доколку ВМРО-ДПМНЕ, Левица, БЕСА, Алијанса за Албанците и Алтернатива не успеат да изгласаат недоверба на владата.
Митовски од „Инфомакс“, покрај тоа што во неговиот пост изнесува дезинформации дека пратеникот на Беса е киднапиран, меѓу другото пишува: „За вакво дупење во мозок на народот, треба да им се случи и улица“.
Уредникот на Лидер, Златев уште пред два дена ги повика граѓаните да излезат на улица доколку не падне владата предводена од Зоран Заев.
Ваквото поттикнување на насилство и омраза, како во овие примери на Апасиев, Златев и Митовски, е забележано и во пресрет на крвавиот 27 април 2017, кога екстремистичките групи насилно упаднаа во Собранието, тепаа и сериозно го загрозија животот на повеќе пратеници и новинари. Поттикнувачите на насилството се спасија од обвиненија.
