Премиерот на Црна Гора, Милојко Спајиќ, синоќа објави дека денеска ќе донесе одлука за привремено укинување на безвизниот режим за турските граѓани по итна постапка.
„За да се зачува економската активност и добрите билатерални односи, во наредниот период ќе иницираме интензивни разговори со Република Турција со цел да се најде најдобриот модел во заеднички интерес во духот на добрата соработка и сојузништвото“, напиша Спајиќ на „X“.
Како што пренесува МИА, синоќа беше воведена вонредна состојба во подгоричката населба Забјело, каде што полицијата спроведе рации откако синоќа во таа населба беше претепан и избоден жител на Подгорица, М. Ј., додека од друга страна, бројни жители на таа населба, револтирани од синоќешниот чин на насилство, се собраа и во неколку наврати извикуваа навредливи пароли против Турците.
На местото на настанот беа голем број полицајци и инспектори, а беа контролирани неколку локации во тој дел од градот.
Репортер на Телевизија Вијести објави дека тројца турски државјани дури се забарикадирале во казино откако, според очевидци, група мештани се обиделе физички да се соочат со нив. По изнесувањето од казиното, полицијата привела двајца турски државјани, а според неофицијални информации, еден од нив е осомничен дека е вмешан во синоќешниот напад.
Полицијата во Подгорица ги уапси државјанинот на Азербејџан Ј.Г. (31) и турскиот државјанин Н.Д. (54), осомничени дека го повредиле М.Ј. во Забјело, Подгорица. Тие се осомничени за кривично дело насилно однесување, пренесува Вијести.
Во соопштението на Полициската управа се наведува дека синоќа во просториите на Одделот за безбедност во Подгорица биле донесени 45 лица – државјани на Турција и Азербејџан, кои биле предмет на кривична обработка, како и проверки во врска со законитоста на нивниот престој на територијата на Црна Гора.
Полициската управа апелираше до граѓаните да останат достоинствени, да не подлегнуваат на емоции или повици за линч.
М. Д.
