Минималното подобрување на Индексот на перцепција на корупцијата (ИПК) за 2022 година на Транспаренси Интернешнл, не е доволно, но е за поздравување, смета министерот за правда Никола Тупанчески, посочувајќи дека тоа дава надеж и е мотивирачки.
Прашан за негов коментар за најновиот извештај за корупцијата на Транспаренси Интернешнл, Тупанчевски вели дека и коментарите во однос на индексот на перцепција за корупција се во зависност од перцепцијата што ја имаме, но како министер смета дека треба уште многу да работиме за подобрување на состојбите на тој план.
– Формално правно земено, ние имаме подобрување на состојбите за неколку места и тоа е за поздравување. Дали е доволно – не е доволно, меѓутоа, сепак, самиот чин или самиот податок дека имаме поместување во позитивна смисла на зборот, вклучувајќи ги и земјите од регионот дава надеж дека некои работи минимално, меѓутоа се поместени во позитивна смисла на зборот. Добро е тоа. Меѓутоа, ако ме прашате мене како министер треба уште многу да работиме за подобрување на состојбите на тој план. Ова е само мотивирачки, изјави денеска Тупанчески по посетата на Апелациониот суд во Штип.
На Индексот на перцепција на корупцијата (ИПК) за 2022 година на Транспаренси Интернешнл, што беше објавен вчера, земјава е рангирана на 85 место од 180 држави со 40 индексни поени, што претставува е подобрување од еден индексен поен во однос на минатата година.
