Украинските сили на 5 јуни направија ограничен напредок северно и југозападно од Бахмут, објави Институтот за изучување на војната (ISW) во својот извештај.
Украинската заменик министерка за одбрана Хана Маљар извести дека украинските сили спроведуваат офанзивни операции на источниот фронт во областа Бахмут и напредувале 200 до 1.600 метри во правец на Орихово-Василивка (11 км северозападно од Бахмут) , и 100 до 700 метри во близина на Иванивске (6 километри западно од Бахмут) и Клишчиивка (7 километри југозападно од Бахмут).
Портпаролот на украинската источна група, полковник Серхиј Черевати, објави дека механизираните украински сили исто така напредувале од 300 метри до еден километар во правец на Зализњаске (13 километри северно од Бахмут) и Бохданивка (8 километри северозападно од Бахмут).
Украинскиот претседател Володимир Зеленски им се заблагодари на украинските сили во насока Бахмут за „придвижувањето напред“ во нивните области на одговорност на 5 јуни.
Шефот на групата Вагнер, Евгениј Пригожин, тврдеше дека украинските сили зазеле неодреден дел од Берхивка (6 километри северно од Бахмут) и ја критикуваше руската воена команда за претходно повлекување на руските сили од акумулацијата Берхивкси на 12 мај за да ги заштитат нивните позиции во населбата.
Руските милблогери тврдеа дека руските сили ги одбиле украинските напади во правец на Соледар (12 километри североисточно од Бахмут), најверојатно мислејќи на пошироката област северно и североисточно од Бахмут. Еден милблогер тврдеше дека руските сили се бореле со украинските сили во близина на Роздоливка (19 километри североисточно од Бахмут). Друг милблогер тврди дека украинските сили исто така ги нападнале руските позиции на неодредена локација во областа Сиверск (31 км североисточно од Бахмут). Руските милблогери тврдеа дека руските сили одбиле украински напад во близина на Мајорск (21 км југозападно од Бахмут) и северно од Хорливка (26 км јужно од Бахмут). ISW не забележа визуелна потврда за напредокот на Украина во Бахмут поврзан со овие ограничени офанзивни акции на 5 јуни.
Руските и украинските власти го сигнализираат почетокот на украинската контраофанзива. ISW не нуди проценка на овие сигнали во овој момент. Руското Министерство за одбрана (МО) на 5 јуни тврдеше дека украинските сили спроведоа „офанзива од големи размери“ на пет сектори на линијата на фронтот во југозападната Доњецка област на 4 јуни и дека руските сили ги одбиле сите украински напади и го назначиле началникот на Генералштабот на руската армија, генерал Валериј Герасимов, да ја надгледува југозападната линија на фронтот од Доњецк.
Украинската заменик министерка за одбрана Хана Маљар на 5 јуни истакна дека украинските сили „се префрлаат на офанзивни акции“ во некои неодредени области на фронтот. Маљар додаде дека руски извори активно шират информации за украинската контраофанзива за да го одвратат вниманието од руските загуби во правецот Бахмут. Тврдењата на руското Министерство за одбрана дека руските сили веднаш ги одбиле украинските контраофанзиви се во согласност со претходните лажни руски тврдења изнесени за време на минатите контраофанзиви. Украинските сили веројатно остваруваат ограничени придобивки и покрај руските негирања. ISW нема да се обиде во овој момент да процени дали овие придобивки се или не дел од пошироки контраофанзивни операции.
Исто така, ISW забележа зголемување на борбената активност во различни сектори на фронтот, но нема да шпекулира за намерата, тежината или фокусот на украинските контраофанзивни операции. Успешната контраофанзивна операција може да потрае неколку дена, недели или дури месеци пред нејзиниот исход да стане целосно јасен, за кое време руските извори може лажно да тврдат дека ја поразиле.
Меѓународниот дописник Џон Спаркс за Скај њуз вели дека експертите со кои разговарале укажуваат на низа воени ангажмани, веднаш по должината на границата долга 1.000 километри, сугерирајќи дека во овој момент Украинците истражуваат.
„Тие бараат слабости во руската одбрана, но не ја започнаа вистински контраофанзивата. Доказ за тоа може да се најде во фактот што не видовме никаков доказ за користење на ново западно вооружување во борба – на пример тенкот Челинџер, ниту пак има доказ за голем удар од страна на Украинците на фронтот, вели Спаркс.
Говорејќи неколку часа по средбата со министерот за надворешни работи на Обединетото Кралство во Киев, украинскиот претседател Володимир Зеленски рече дека Москва реагирала „хистерично“ на „секој чекор што го преземаме“ во Доњецк.
„Најпрво, благодарен сум на секој наш воин, на сите наши бранители кои ни ја дадоа веста што ја очекуваме. Насока Бахмут – браво, воини!, изјави Зеленски и додаде: „Непријателот знае дека Украина ќе победи. Тие тоа го гледаат“.
Валериј Шершен, портпарол на заедничкиот прес-центар на одбранбените сили од правецот Таврија за време на телетонот United News изјави дека по Бахмут, најжешката точка на фронтот во моментот е кај Мариинка, пренесува Укринформ.
„По ситуацијата во и околу Бахмут, Мариинка останува жешка точка број два. Уште еднаш е потврдено дека непријателот ќе продолжи да ги фокусира своите главни напори на обидите за целосно окупирање на регионот Луганск. Во изминатиот ден се случија повеќе од 40 борбени ангажмани Во оперативната зона на одбранбените сили од правецот Таврија, непријателот продолжува да спроведува офанзивни операции во насока Андријивка, ја држи активната одбрана во регионот Запорожје, имено во правците Новопавливка и Орихив. Тука непријателот ја чека нашата офанзива. Се фокусира нејзините главни напори да ги задржи своите единици во постојана борбена готовност, продолжува да ги зацврстува своите линии и позиции, ги уредува минските полиња“, рече портпаролот.
Д. Мишев
