од корнер ЗОРАН ИВАНОВ
Не`излажаа, не`изиграа, не`извозија као зелени мајмуни. Водствата на СДСМ, на ДУИ, на ВМРО-ДПМНЕ како да му коленичеле на Макрон да стави вето за Македонија. Тој нам ни ги урна надежите за побрза Европа. Ним им направи алиби за амнестија на сите криминали.
Сега сета, партиска, политичка и институционална енергија ќе се врти околу полугодишниот празен од. Ќе се препелка во вакуумот креиран за потребите на предвремените парламентарни. Во едени вакви околности кога правдата на носилка е изнесена од теренот, кога е исфрлена од фокусот на јавноста, апатијата надвиснува како доминантна општественна психолошка состојба.
Ова со избори само шест месеци пред редовните, практично само четири поради летните јули и август, е манипулација од супер висока категорија. Непробоен оклоп врз сите истраги, обвиненија, судења. Генијална играрија со која по којзнае кој пат ја збришаа Шарената, ја нагазија правдата, го хипнотизираа немирот. Отидоа во неповрат и сета граѓанска енергија и сите надежи за поправдена и за поспастрена држава.
И сега, што тоа добивме од договорот во претседателскиот кабинет?
Проект на здружените партиски сили за амнестија на сите криминали. Лимбо состојба во која кој украл, украл. Финиш на акцијата што ја почнаа со уривањето на Специјалното на Катица, што го продолжија со блокадата на законот за обвинителството и што, еве, привршува со паркирање на Основното на Вилма.
Но добро, ајде нека не е така. Еве, до изборите, партиите нека си ги бркаат кампањите. И, до април, истрагите нека си ги бркаат криминалците. Во престојниот полугодишен предизборен интервал на ограничени политички влијанија, еве шанса судството да си ја турка својата работа – и онаа од бомбите и оваа од рекетите. Но, тоа нема да се случи. Па на денот на изборите, гласачите ќе си ги бараат со боринче.
Ембаргото од францускиот претседател, на актерите во деценискиот и во актуелниот криминал, им дојде како кец на десетка. Во предизборната маглина ќе посипат пепел врз сите бомби, врз сите рекети, врз сите лоповлуци. Ќе ги замачкаат и ќе ги заташкаат сите обвиненија.
На апашите Макрон им создаде супер амбиент, на македонската правда и`направи супер вакуум.
