Одлуката на министрите за европски прашања за почеток на преговорите за членство со Албанија и Северна Македонија, претставуваат добри вести во овие тешки времиња, оценија претседателот на Европскиот парламент, Давид Сасоли и претседателката на Европската комисија, Урсула фон дер Лејен. Со слична оценка излезе и алтернативниот шеф на грчката дипломатија, Милтиадис Варвициотис, кој изјави дека „ова е важен ден за Европската унија, а со одлуката за почеток на пристапни преговори со Северна Македонија и Албанија, се потврдува стратешката агенда „Солун 2003“.
*
Република Северна Македонија ќе добие 69 милиони евра од ЕУ за справување со состојбата со коронавирусот, соопшти министерот за надворешни работи Никола Димитров.
*
Веста од Брисел за почнување преговори за членство во ЕУ е верификација на успехот на нашите напори, крај на нашето чекање од 15 години по добивање на кандидатскиот статус за членство во ЕУ и признание за постигнатите резулти, истакна премиерот Оливер Спасовски. И претседателот на Собранието, Талат Џафери им ја честиташе на граѓаните одлуката на Советот на ЕУ за почеток на преговори со нашата земја.
*
Датумот – уште една изгубена битка за лудаците, уште една победа за нашата подобра иднина, пишува Петрит Сарачини во својата колумна за ЦИВИЛ МЕДИА.
*
Честитките за одлуката на ЕУ, Северна Македонија да ги започне преговорите за членство, ги преплавија социјалните мрежи, со илјадници позитивни реакции.
*
Не треба да се чека министерски состанок за да се потврди нашето членство во НАТО, туку нашето членство станува и де јуре и де факто во оној момент кога ние ќе го испратиме нашиот ратификуван протокол во Вашингтон, откако тоа ќе го сторат останатите земји членки. Практично моментот кога тој ќе биде примен и активиран во Стејт департментот е момент кога РСМ ќе стане 30 членка на НАТО, истакна вицепремиерката и министерка за одбрана Радмила Шекеринска.
*
Шекеринска регираше на прес-конференцијата на Игор Јанушев од ВМРО-ДПМНЕ и ги повика да престанат со лаги.
-Најдиректно ја демантирам лагата која е јасно дека е лага дури на секој граѓанин кој ќе врзе два со два. Лага е дека било кој, а особено јас изминатава недела, замислете, сум била на службени патувања и сум ги трошела државните пари на патувања и репрезентации. Тоа е истава недела кога скопскиот аеродром во главно беше затворен. Тоа е истата недела кога секој добронамерен па дури и злонамерен граѓанин кој ќе седне на Фејсбук и кликне, ќе види дека јас како и сите други колеги сум секој ден присутна на Главен штаб и на владина седница, рече Шекеринска.
*
Најмладиот пациент заболен од коронавирус во земјава е двогодишно дете од Скопје, потврди министерот за здравство Венко Филипче. Тој рече дека позитивни на коронавирусот се и родителите на детето, но оти сите се со лесна клиничка слика и се на домашно лекување. Семејството било заболено како резултат на локална трансмисија. Во Скопје има седум, а во Куманово пет нови заразени со коронавирусот.
*
Се укинува меѓуградскиот превоз од и до Куманово, се укинува градскиот превоз и се затвораат сите продавници кои се наоѓаат во полузатворените трговски центри во Куманово, соопшти министерот за здравство Венко Филипче на денешната прес-конференција.
*
Тројца припадници на Министерството за внатрешни работи се заболени од коронавирусот. Едниот е полициски службеник во ПС – Бит пазар, вториот е од крим техника и третото лице, кое е денеска потврдено, е од оддел за јавни набавки во Министерството за внатрешни работи.
*
Министерството за внатрешни работи најостро ќе постапи против сите оние лица кои ќе објават на социјалните мрежи лажни вести кои ќе предизвикаат вознемиреност и паника кај граѓаните.
*
Одделението за трансфузилогија во Охрид е затворено заради тоа што персоналот бил во контакт со лице кое како пациент дошло преку системот „Мој термин“, а по неколку дена му се развиле симптоми и сега е дифинитивно дијагностициран со коронавирусот, информира на прес-конференција министерот за здравство Венко Филипче.
Дехран Муратов