Со скромна церемонија, Општина Чаир денес во Паркот „Украина“, во соработка со Амбасадата на Украина во Скопје, ја организираше поставката на скулптурата „Горчливото сеќавање на детството“ – омаж за децата жртви на Холодоморот во Украина (1932–1933) и повик за рефлексија за трагичните последици од војните и неправдите.
На настанот присуствуваше украинска делегација предводена од амбасадорката Лариса Дир, која изрази благодарност за можноста да биде денес овде, на презентациjaта на овој споменик.
За Украинците, ова не е само метална фигура – овој споменик има за нас свето значење. Тоа е спомен и оддавање почит на децата и возрасните кои беа погубени со глад во Украина, по јасна наредба од Кремљ, истакна Дир.
Таа додаде дека руската агресија продолжува, теророт врз цивилното население на Украина сè уште трае.
Сакам искрено да се заблагодарам за поддршката на Украинскиот народ, за вашата солидарност, човечност и духовна блискост. Ви благодарам Вам лично, почитуван господине Висар Ганиу, и на Вашиот извонреден, креативен тим, како и на сите кои придонесоа за поставувањето на овој споменик. Таа поддршка нè инспирира, ја зајакнува нашата вера и ја храни нашата надеж. Ви благодарам за Вашето пријателско рамо, нагласи амбасадорката Дир.
Подготви: Д. Мишев
Камера: А. Мехмети
