Израелските власти побараа од претседателот на Република Српска, Милорад Додик да ја напушти конференцијата за антисемитизам во Ерусалим, откако по него беше распишана меѓународна потерница, објавија денеска израелските медиуми, пренесува Данас.рс.
Во написот на весникот „Израел Хајом“, кој го пренесоа сараевските медиуми, се наведува дека израелските власти „јасно му ставиле до знаење на Додик дека не е добредојден на настанот, што го принудило да го напушти местото на настанот“.
„Судот во Босна и Херцеговина издаде налог за апсење на Милорад Додик, водачот на српското малцинство во земјата, поради сепаратистички активности. Додик моментално присуствува на конференција за антисемитизам во Ерусалим, организирана од израелскиот министер за дијаспора и антисемитизам Амичаи Чикли“, се наведува во текстот.
Се додава дека Додик е осуден на една година затвор и шестгодишна забрана да ја извршува функцијата претседател на Република Српска.
„Додик, долгогодишен проруски поборник за отцепување од Босна и Херцеговина и сојузник на рускиот претседател Владимир Путин, го протурка законот со кој се забранува работата на босанското државно правосудство и полиција во ентитетот со мнозинство српско население“, пишува израелскиот весник, потсетувајќи дека законот е привремено суспендиран од Уставниот и Уставниот суд на Босна и Херцеговина.
Во текстот се наведува дека Додик постојано се заканувал дека ќе ја одвои Република Српска од Босна и Херцеговина и ќе ја спои со соседна Србија и дека западните земји „предупредиле дека тоа уште еднаш ќе предизвика насилен конфликт во регионот“.
Протоколот на израелската влада буквално го турна господинот Додик од седиштето до Нетанјаху.
The Israeli government’s protocol literally pushed Mr. Dodik out from the seat next to Netanyahu. pic.twitter.com/FyEnGFnNEV
— Haris Imamović (@SkenderVakuf) March 27, 2025
Протоколот на израелската влада буквално го истурка господинот Додик од седиштето до Нетанјаху, напиша Харис Имамовиќ во постот на Х во кое објави видео од настанот.
Веста дека израелските власти побарале од Додик да ја напушти конференцијата за антисемитизам, прв ја објави Ширит Авитан Коен, новинар на весникот Израел Хајом.
„Мини-драма на конференцијата против антисемитизмот во Ерусалим. По објавувањето на веста за неговото апсење, се чини дека израелските власти јасно му кажале на Додик, кој присуствуваше на настанот, дека не е добредојден, а тој и неговата придружба го напуштија местото во последен момент“, рече Авитан Коен.
Додик утрово учествуваше на тркалезната маса на конференцијата, на која меѓу другото рече дека Бања Лука го поддржа Израел на 7 октомври 2023 година, денот на нападот на палестинскиот Хамас на југот на таа земја и дека во тоа време во Сараево се одржувале пропалестински протести.
М. Д.
