Одлуката на Здружението на српските доброволци од војните 1912-1918 година да му ја додели наградата „Војвода Вук“ на заменик-претседателот на Владата, Иван Стоиљковиќ, претставува длабоко навредлив и провокативен чин, особено имајќи ја предвид мрачната историја на злосторствата извршени од српските доброволни сили врз Албанците во Северна Македонија во периодот 1912-1918 година, познат како геноциден период, велат од ДУИ.
„Во тој период, особено за време на Балканските војни и Првата светска војна, цивилното население на територијата на денешна Северна Македонија, особено Албанците, се соочија со етничко чистење, масакри и масовни протерувања. Историските извори сведочат за палење на цели албански села, силувања, тортура и масовни егзекуции. Во Тетово, Гостивар, Скопје, Кичево и многу други региони, Албанците беа цел на српските сили, кои ги третираа како пречка за проектот на асимилација и територијална експанзија“, велат од ДУИ.
Од таму додаваат дека според историските сведоштва, десетици илјади Албанци беа убиени, а илјадници други беа насилно протерани од своите домови.
„Во некои случаи, варварствата вклучуваа силувања и живо палење на албански цивили. Овие злосторства не само што оставија длабоки рани кај албанскиот народ, туку и ги зајакнаа поделбите и етничките тензии кои сè уште се чувствуваат денес“, велат од ДУИ.
Партијата од Мала Речица нагласува дека трагична иронија е што државен функционер, кој раководи со министерството одговорно за Охридскиот договор и претставува држава која треба да промовира помирување и соживот, прифаќа одликување од здружение кое е директно поврзано со толку болен период за Албанците во Северна Македонија и го објавува тоа како признание.
„Овој чин не е ништо помалку од обид за легитимирање на минатите злосторства и навреда на споменот на илјадниците албански жртви. Почитувањето на споменот на жртвите и прифаќањето на историските вистини се единствениот темел за помирување и заедничка иднина. Албанците во Северна Македонија нема да молчат пред обидите за легитимирање на неправдите од историјата“, додаваат од ДУИ.
Министерот за односи со заедниците Иван Стоиљковиќ на својата Фејсбук страница објави дека Здружението на воените доброволци и нивните потомци 1912-1918 година го одликуваше со Орден на Војводата Вук како признание за неговата демократска борба и јакнењето на положбата на српскиот народ.
Д.М.
