Задоцнетата интервенција на поранешното раководство на Музејот на Македонија за санирање на штетите во Галеријата на икони, откако паднал дел од таванот, на 9 март годинава, предизвикала дополнителни оштетувања врз ова раритетно, културно наследство. По извршениот увид, Министерството за култура, деновиве презема итни мерки за санација на состојбата. Веднаш е извршена и кадровска промена, па за вршител на должност – директор е именуван Гордан Георгиев, на местото на досегашната директорка Мирјана Нинчовска, која што, според Министерството, не ги презела потребните мерки навреме.
Најстарата музејска институција во државата, Музејот на Македонија, со највредни музејски збирки, како што е Галеријата на икони, коишто се предмет на проучување на врвни домашни и светски специјалисти, како што рече министерот за култура, Роберт Алаѓозовски, „од претходната власт била третирана како депо, се извлекувале артефакти, што се користеле во новите партиски музеи“. Но, според него, „она што е најстрашно, е целосната маргинализација на оваа институција, што е видливо, и поради тоталната незаинтересираност за збирката на икони, која по својата вредност е една од најбогатите и најпознатите сочувани збирки на Балканот“.
„Токму овие врвни примероци на иконопис, досегашното раководство ги остави да пропаѓаат во неадекватни услови, во простории коишто при секој пороен дожд прокиснуваат! Делата се дополнително изложени на оштетувања од високите температурни разлики, поради отсуство на систем за климатизација. Истото се случува и со етнолошката збирка, чија вредност е исто така, исклучителна. За овие докажани и потврдени вредности од нашето културно наследство, претходната власт не почувствува потреба да инвестира и да обезбеди услови за нивно опстојување и презентација пред светската јавност“, вели министерот Алаѓозовски.
Новоформираните раководни тимови на Музејот, Националниот конзерваторски центар и Градскиот конзерваторски центар, како што рече министерот, интензивно работат на утврдување на степенот на загрозеност на иконите и фреските од Галеријата, како и на изнаоѓање на соодветни простории со микроклиматски улови, во кои привремено ќе бидат депонирани експонатите, сè до нејзина санација и обезбедување на соодветни микроклиматски услови.
„Стручниот тим од Градскиот конзерваторски центар, ќе предложи и архитектонски решенија за итна санација на просторијата, во којашто ќе бидат сместени иконите. Министерството за култура ќе изврши ревизија и на состојбата на музејските збирки и условите во коишто се чуваат и презентираат врвните вредности од нашето културно наследство и ќе изработи приоритетна листа за санација на штетите предизвикани од претходната власт. Нашето културно богатство е од најголемо значење и највисок приоритет за нас, и ние нема да дозволиме тоа да не се заштитува соодветно и да се уништува како досега“, дециден е Алаѓозовски.
Инаку, Галеријата на икони во Музејот на Македонија во Скопје, е најрепрезентативната од ваков вид во државата, заедно со Галеријата на икони во охридскиот Музеј и завод. Поставката содржи икони, коишто датираат од почетокот на 14 до средината на 20 век. Според Законот за заштита на културното наследство, оваа збирка на икони е прогласена за културно наследство од особено и исклучително значење.
М. Талеска
